Правительстве пӧртыштӧ Александр Евстифеевын вуйлатымыж почеш Марий Элыште правопорядкым эскерыме шотышто координационный совещаний эртен.
Погынышо-влак Россий Федерацийыште 2025 ий марте экстремизм ваштареш кучедалме стратегийым кузе илышыш пуртышаш, республик кумдыкышто этиловый спиртым, алкоголян да спиртан сатум ыштыме да ужалыме сферыште кугыжаныш контроль нерген мутланеныт, 2020 ийлан планым палемденыт.
Республикын прокуроржын алмаштышыже Павел Шамов республик вуйлатышылан ведомствын 2019 ийыште шуктымо паша дене палдарен.
Марий Элын молодежный политике, спорт да туризм министрже Лидия Батюкова экстремизм ваштареш кучедалме дене келшышын, республикыште илыше-влакым таза илышым вӱдаш, спорт дене кылым кучаш таратыме да кумылаҥдыме паша эртаралтме нерген каласкален. Регион вуйлатыше тыгодым палемден: улшо спорт объектла дене олалаште веле огыл, яллаште илыше-шамычынат пайдаланаш йӧнышт лийшаш. Тудо муниципал образованийлаште тыгай вер-влакым ыштыме йодышым контрольышто кучаш кӱштен.
Совещаний мучаште Марий Эл вуйлатыше профилактике да контроль мероприятий-влакым шуктымо годым ведомство-влаклан икте-весышт дене ваш мутланен келшен пашам ышташ темлен.
Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен
