Таче элыштына мемнан, журналист-влакын, кечына — Россий Печать кече — палемдалтын. А пайремыште эн ончычак мом ыштат? Ойыртемалтше пашаеҥ-влакым саламлат!
«Марий Эл» газет редакцийнан коллективыштыжат тений куд еҥ поснак кыртмен пашам ыштен да нунын тыршымыштым тӱрлӧ кӱкшытыштӧ акленыт, награде дене палемденыт. Тиде радамыште теве могай пашаеҥна мом сулен:
Марий Эл вуйлатышын Тауштымашыжым журналист Раисия Чепакова ден вёрсткым ыштыше Эльвира Казаковалан кучыктеныт;
Марий Эл правительствын кодшо ийысе «Марий Эл Республикым социально-экономически вияҥден толмым эн сайын ончыктымылан» журналистике шотышто премийжын лауреатше-влакым теният палемден. Тушто «Республикысе калык-влакын национальный ойыртемыштым ончыктымо шотышто эн сай паша» номинацийыште журналист Светлана Носова ойыртемалтын;
Марий Эл Республикын Социальный вияҥмаш министерствыжын Чап грамотшым журналист Маргарита Ивановалан кучыктеныт;
журналист Юрий Исаков «МедиаТЭК – 2019» Всероссийский конкурсын региональный этапыштыже I верым налын да диплом дене, тыгак Россий журналист ушемын грамотыж дене наградитлалтын;
журналист Любовь Камалетдинова Россий Федерацийын Цифровой вияҥмаш, связь да массовый коммуникаций министерствыжын Чап грамотшо дене палемдалтын.
Пашам пырля ыштыше йолташна-влакым, тыгак моло савыктыш ден организацийлаште тыршыше коллегына-шамычымат эртыше пайремна дене эше ик гана саламлена да ончыкыжымат тыгак тыршен пашам ышташ тыланена. Арам огыл ойлат: «Пашатым йӧратет гын, чап ден лектыш «поктен шуыт».
Любовь КАМАЛЕТДИНОВА
