УВЕР ЙОГЫН

Мом эн ончыч колыда – тидак мо лийшашым рашемда

У ий йӱдын моткочак кугу ю виян улмыжлан чыланат ӱшанена. Санденак эн кугу шонымашнам возена, ойлена, эсогыл курантын 12 гана перымыж жапыште кагазыш серена, йӱлалтена, ломыжшым шампанскийым темыман бокалыш пыштена да йӱын шукташ тыршена. Тыге шушаш ийыште шонымашна шукталтешак манын чотак ӱшанена.

Тиде йӱлам шукын шуктат. Но тылеч посна эше моло палым шотыш налмат у ийыште пиалан лияш полшен кертеш. Таче икмынярже дене палдарена:

* У ий пайрем ӱстембалне шинчал ате эн покшелне вераҥдалтшаш. Тудо шем вийым лӱдыкташ, уда энергетикым пытараш полша;

* шинчалым йоҥылыш веленда? Нимат огыл. Тений тиде, мӧҥгешла, сай палылан шотлалтеш. Сандене илышыштыда ончыкыжым иктаж-мо уда лиеш манын, йӧршынат ида ойгыро. Но сай лийже манын, шинчалым лӱмын велыман огыл;

* пелйӱд марте пӧрт гыч шӱкшакым луктын кудалташ огеш йӧрӧ. Тидым лучо эрдене ыштыза;

* У ий «дресс-кодым» шотыш налза — идалыкын озажлан келшыше тӱсан вургемым, а шушаш ий Ош комаголян идалыкше лиеш, тугеже ош тӱсаным — чийыза да пеленда Комаголя талисманым кучыза. Тыге шушаш ийын товатат,  пиал тендан деч кораҥ огеш кай;

* эше ик оҥай пале тыгай: курант-влакын кырен пытарымекышт, ӱстел коклаште шинчымыда годым могай мутым эн ончыч колыда, тудак шушаш ийда могай лийшашым палдара.

 

У ий йӱдым мом ышташ огеш лий:

  • ӱчашаш, вурседылаш, шургаш;
  • атым пудыртылаш;
  • йокрокланаш, иктаж-молан але иктаж-кӧлан вуйым шияш;
  • кочкышым луктын кудалташ, кӱмыж-совлам мушкаш.

 

Чыла нине пале ден йӱлам шуктеда, шушаш 2020 ийым чонланда келшыше лишыл еҥ-влак коклаште да нӧлталтше кумыл дене вашлийыда гын, Ош Кӱртньӧ (Металлический) Куголя тыланда пиалым кондышашак! 

 

Л.КАМАЛЕТДИНОВА

Опубликовать в Одноклассники

Добавить комментарий