Тений Медведево районысо Шойбулак гыч Екатерина Смирнован ече тургымжо моткоч пиалан лийын манаш келшен толеш.
Марий ӱдыр Красноярскыште эртыше XXIX тӱнямбал теле универсиадыште вийжым терген. А декабрьыште тӱнямбал кубок верч таҥасымаште Российын чапшым арален.
Универсиадыште Екатерина тӱҥалтыш кечылаштак кок стартыш лектын (3, 5 март), кок ший медальын озаже лийын. Икымше кечын классике йӧн дене 5 километрыште ойыртемалтын гын, вес кечын – эрыкан йӧн дене. Кумшо март элнан сборныйжылан моткоч пиалан лийын. Ты кечын пьедесталын чыла верыштыжат россиян-влак шогеныт. Нуным элнан президентше В.Путин шкеак саламлен, пєлекым кучыктен.
– Универсиаде – кугу ответственность. Кок таҥасымашланжат тӱрлӧ семын ямдылалтынам. Мутлан, классике йєн дене сайын куржын эрташ, моло деч почеш кодаш огыл манын шоненам. Кокымшо верыш лекмем вучыдымо ыле. Вет мый эрыкан йєн дене сайынрак куржам. Сандене пеш куаненам, пиалан улам. Ик семынже призёр улмемлан куаненам, а вес велым – тактикыште йоҥылышым ыштенам. Таҥасыме годым тидын нерген от шоналте, чылажат пеш писын эрта. Мый тыгай кӱкшытан таҥасымаште икымше гана улам. Сандене мыланем чылажат у. Команде икоян, – таҥасымаш деч вара манын тунам Е.Смирнова.
Ече дене спорт мастер, теле Универсиадын (2019 ий) кум гана ший призёржо, команде дене сеҥыше Екатерина Смирновам Молодёжный политике, спорт да туризм министерствыште Марий Эл правительствын Почётан грамотшо дене палемденыт. Тыгак ХХIX тӱнямбал универсиадыште сай результатым ончыктымыжлан ечызылан окса пєлекым кучыктеныт.
4 апрельыште Архангельскыште ече дене Россий сборный командын тренер ушемже погынен. Тушто Марий Эл гыч Екатерина Смирновам ече дене тӱҥ сборный командышке пурташ пунчалыныт.
Теве ынде Екатерина тӱнямбал кубок верч таҥасымаште икымше гана вийжым терга. Классике, тыгак коньки йӧн дене таҥасымашыж денат моло деч почеш огеш код.
Е.ЭШКИНИНА
