Энсай
ЭКОНОМИКЕ

«Российын эн сай 100 сатужо»

Марий Эл Торгово-промышленный палатын выставке залыштыже тыгай лўман да регион кўкшытан конкурс тений колымшо гана эртен

Элысе рынкым вияҥдымаште ты конкурсын надырже, мутат уке, изи огыл. Вет тудо калыклан кўлешан сатум ӧрдыж гыч кондымо олмеш шкенан дене ыштен лукмашке да ончыл йӧным шыҥдарымашке виктаралтын.

Конкурсын регион кўкшытан йыжыҥышкыже тений 30 предприятий ден организаций шкеныштын 56 тўрлӧ продукцийышт да услугышт дене ушненыт. Нуно икмыняр тўрлӧ – кочкыш, промышленный сату, производственно-технический кўлешлыкан продукций да услуго, калык да художественный промысел изделий, калыклан услуго – номинацийыште аклалтыт.

Кочкыш сатум аклаш темлыше поснак шуко лийын. «Акашевский» сурткайык фабрикын купатше ден бужениныже, Шернур сыр заводын ушкал шӧр гыч ваниль торыкшо, каза шӧр гыч сырже да шорык шӧр гыч биойогуртшо, «Семёновский» племзаводын имне шӧр гыч кумысше да пулдырчо муныжо, Йошкар-Оласе хладокомбинатын каза шӧр гыч мороженыйже, оласе 1-ше №-ан кинде заводын ру деч посна кўэштме «Марий легенде» киндыже, Красногорский посёлко гыч «Вкуснотеевъ» фирмын эрвел шере кочкышыжо тамлен ончаш кумылым савыреныт. Шукертсек тыгай выставкыште «Звениговский» шыл комбинатын продукцийжым ужаш логалын огыл ыле. Тений тудо тўрлын ямдылыме шыл кочкышыж дене чылам ӧрыктарыш.

Калыклан кўлешан промышленный сату радамыште шочын вочмо пагыт гычак азан атышӧржым мушкаш «Геникс» НПФ-н ямдылыме гельжым, «Гардиан» системысе предприятий-влакын омсашт ден кӧгӧныштым, «Потенциал» ООО-н домофон устройствыжым ончыкташ лиеш. А промышленно-технический кўлешлыкан продукций радамыште Марий картонаж мануфактурын гофрокартон гыч изделийжым, Марий силикат кермыч заводын у форман да тўсан кермычшым, Полупроводник прибор заводын металл керамике корпусшым палемдыде ок лий.

Конкурсын регион кўкшытан йыжыҥыштыже ойыртемалтше-влак май мучаште пале лийыт да умбакыже федерал кўкшытыштӧ таҥасаш тўҥалыт. Тушто сеҥыше-влак шыже мучаште рашемыт. Нуно диплом да сеҥышын статуеткыж дене веле огыл палемдалтыт, тыгак шке продукцийыштышт конкурсышто сеҥышын знакшым кум ий почела шындаш правам сулен налыт.

Ю.Исаков.

Снимкылаште: «Звениговский» шыл комбинатын сатужо эн поян ыле; Йошкар-Оласе 1-ше №-ан кинде завод сийжым тамлаш темла.

Опубликовать в Одноклассники