УВЕР ЙОГЫН

Уэмдыме тӱвыра пӧрт унам вашлийын

«Тӱвыра» национальный проектын «Тӱвыра алан» регионысо программыж  почеш Морко район Красный Стекловар посёлкысо тӱвыра пӧртым уэмден олмыктымо деч вара кодшо кечылаште торжественно почыныт.

Олмыктымо пашалан 5718,6 тӱжем теҥге ойыралтын. Шийвундо леведышым вашталташ, пластик омсам, окнам шындаш, зданийын тӱжвал тӱсшым уэмдаш да верандым ачалаш кучылталтын. Икманаш, изижланат-кугужланат жапым пайдалын эртараш да тӱрлӧ кружокышто мастарлыкым шуараш йӧн ышталтын.

У тӱсым налше тӱвыра пӧртым почмаште республикын тӱвыра, савыктыш да калык паша шотышто министрже Константин Иванов, Морко район администраций вуйлатыше Александр Голубков, районысо тӱвыра, спорт да туризм пӧлка вуйлатыше Юлия Яковлева лийыныт.

К.Иванов чоҥышо-влаклан да ты тӱвыра учрежденийлан у тӱсым пуымашке  ушнышо-шамычлан кугу пашам ыштымыштлан да чылажымат шот дене шуктымыштлан таум ойлен да тыгерак палемден:

— Уэмдыме пӧртыштӧ тӱвыра илыш шолаш да у проект-влак шочаш тӱҥалыт манын шонена.Тиде сценыште чапле концерт программе да оҥай спектакль дене  республикысе театр коллектив-влакат толаш тӱҥалыт манын ӱшанем.   

Мучашлан пайремыш погынышо-влакым верысе артист-влак мастарлыкышт дене куандареныт.

А.БАЙКОВА

Опубликовать в Одноклассники

Добавить комментарий