14 декабрьыште Йошкар-Оласе «Юбилейный» спорт комплексыште Российын Геройжо Марк Евтюхиным шарныме лӱмеш бокс дене финал эртен.
Тушко Марий Элын тӱрлӧ кундемже, тыгак пошкудо регионла гыч боксёр-влак чумыргеныт. Нунын таҥасымыштым ончаш залыш моткоч шуко калык погынен. Толшо-влак палымышт, икшывышт, йолташышт верч тургыжланеныт. Участник-шамычат нуным куандараш тыршеныт, вет рингыште моткоч виян бой эртен. Патыр-влак технике, тыгак мастарлык дене ойыртемалтыныт. Нокаутат ик гана веле огыл лийын.
Такшым ты видыште Татарстан да Чуваш республикла гыч толшо-влак ойыртемалтыт. Нунын велым спорт торжалыкат шижалте. Изирак ийготан-влакак писылыкышт, тура да технически чын улмышт дене ӧрыктареныт. Тренер-шамычат ты видыште лач спорт торжалык кӱлмым палеменыт. «Бой деч ончыч шкем кучен моштымаш, психически ямде лиймаш – боксышто эн тӱҥ», – маньыч шукышт.
Тренер Максим Якаев жапше годым шкежат мастар спортсмен семын аклалтын. Латвич ийыште рингыште 200 наре бойым эртен. Мутат уке, тӱрлыжат лийын: модын колтен, сеҥен, сусырген. Икымше таҥасымашыже тудын Йошкар-Олаште эртен. Лу ияш рвезе «Бокс – наркотик ваштареш!» ўжмашан турнирыште вийжым терген, икымше верым налын. Ты сеҥымаш кугу спортлан кумылаҥаш таратен. Коло ияш Максим Челябинск областьыште эртаралтше турнирыште Российын спорт мастерже нормативым шуктен. Ешым чумырен. Кызыт тудо ачаже Эрик Николаевич Якаевын корныжым тошка, тренерлан пашам ышта. Ӱдыр-рвезе-влакым таза илыш-йӱлалан, спортлан кумылаҥда. Ты гана тудо эн шуко боксёрым рингыш луктын.
– Тыгай турнир кӱлешак. Тыште ты гана нылле утла воспитанникна-влак вийыштым тергат. Сай бойым ончыктат. Южыштлан икымше веле, но вет опытым рингыш лектын веле налаш лиеш. Йӧн лийын вийыштым тергаш, – манеш М.Якаев. – Тыршаш, пашам йӧраташ кӱлеш, тунам результатшат куандарыше лиеш. Ты турнирыште вийым тергыше кажне участникым сай велым гына палемдаш лиеш. Рингыш лектын – шкенжым шке сеҥен. Молодец! Тиде гана Алексей Петухов, Сердар Гылычкымырадов ойыртемалтыныт. Ӱдыр-влак коклаште Мария Швецова икымше гана вийжым терген, кок бойым эртен, ончыко лектын. Мемнан воспитанникна-влак єрдыж кундемлаштат сай результатым ончыктат. Мутлан, шукерте огыл Кострома областьыште эртаралтше турнирыште шке тӱшкаштышт Даниил Драчёв, Николай Рыбаков икымше верым налыныт. Арняште ме куд кече тренировкым ыштена. Кажне группын шке жапше уло. Бокслан кумылан-влакым кызытат секцийыш налына. Толышт, вучена. Кугырак ийготан-влакымат пагален ўжына.
Тиде турнирыште шке тӱшкаштышт ятыр ӱдыр-рвезе ойыртемалтын. Организатор-влак призёр-шамычлан грамот дене кубокым кучыктеныт.
– Меат такшым пеш лушкыдыжак огынал. Командына гыч шукышт кубокым сеҥен налыныт. Таче 60 килограмм нелытан спортсмен-влак коклаште икымше верым налынам. Мыланем тыште таҥасаш келша. Чылаже 62 гана бойым эртенам. Эн шарнымашан семын тений шошым Пермьыште Юл кундем федерал округышто эртыше турнирым палемдыме шуэш. Мый тушто эн изи (13 ияш) рвезе кугурак ийготан-шамыч дене таҥасенам, кумшо верым налынам. Мутат уке, соперникем пеш виян лийын. Но тиде сай веле: мыланем опытым пуэн, – ойла призёр радамыш логалше Волжский районысо Приволжский посёлко гыч Никита Пушков.
Бокс дене вес таҥасымаш декабрь мучаште лиеш.
Бокс – тиде айдемын пеҥгыдылыкшым шымлыше науко маныт. Тудо койыш-шоктышым пеҥгыдемда, дисциплинылан туныкта.
Е.ЭШКИНИНА
