Звенигово олаште илыше-влаклан тений шуко мом ужаш да чыташ, шуко молан тургыжланаш да куанаш логале. Марий Эл правительствын оласе канализаций коллекторым тӱрыснек вашталташ да модульный у насос станцийым шындаш оксам ойырымыжо, тиде пашам кӱчык жапыште ыштен шукташ кӱштымыжӧ, тыгак Звенигово район да ола администрацийлан тыршымышт дене Юл сер кумдыкым уэмден олмыктымо деч вара калык мыняр-гынат лыпланыш. Но идалыкын пытартыш тылзыже тудлан эше ик «сюрпризым» ыштыш да магистральный вӱд пучынат чот локтылалтмыж нерген ушештарыш.
…2 декабрьыште Гагарин уремысе 62-шо №-ан пӧрт воктене вӱд пуч шӱтлен, да Ленин, Гагарин, Советский, Ростовщиков, Пушкин, Бутяков, Школьный уремлаште шуко пачеран 37, тыгак 50 шке пӧртыштӧ илыше 5540 еҥ йӱштӧ вӱд деч посна кодын. Аварийым кас марте кораҥден кертме.
Тыгай сынан азап 6 декабрьыштат лийын. Кечывалым Ленин уремысе 1-ше №-ан пӧрт воктене электропередаче линийым олмыктеныт. Официальный огыл увер почеш, электрик-влак заземленийым ыштымышт годым магистральный вӱд пӱчым шӱтен кертыныт. 16 шагатлан ола адакат вӱд деч посна кодын. А 20 шагат деч вара электротулат икмыняр жаплан йӧрен… Аварийым «Звенигово вӱд канал» ООО шке вийже дене кораҥден: шым еҥлан кок единице технике полшымо дене чот тыршаш логалын.
Кугарнян, 13 декабрьыште, Звенигово олаште йӱштӧ вӱд 8 шагатланак лийын огыл. Магистральный вӱд пучышто кугу аварий лиймылан кӧра адакат шуко пӧрт, Звенигово районысо рӱдӧ больнице, «Карусель», «Светлячок» да «Буратино» йочасад-влак, 3-шо №-ан школ вӱд деч посна кодыныт.
Режиссёр Григорий Александровын шындыме «Волга-Волга» музыкальный комедийыштыже вӱдым шупшыктышо Кузьма Иванович (актёр Павел Оленёв) тыге мура: «Удивительный вопрос: почему я – водовоз? Потому что без воды и ни туды, и ни сюды..» Эше 1938 ийыштак тыгай изи мыскара гоч моткоч кугу чыным каласеныт! Вӱд деч посна кодшо Звенигово оласе калыкат пеш кугу йӧндымылыкыш логалын: ны медицине манипуляцийым эртараш, ны кочкаш шолташ, ны амыргыше азам мушкаш, ны шондан дене пайдаланаш… Йӧра эше йӱшаш вӱдым кум машина дене ола мучко кондыштареныт, шукышт тудым эше кевытыште налыныт.
Звенигово ола администрацийын йодмыж почеш аварийыш «Волжск оласе вӱд канал» ОАО-н пашаеҥже-влак кок единице спецтехнике дене полшаш толыныт да «Звенигово вӱд канал» ООО-н пашаеҥже-шамыч дене пырля азапым 15 шагат лишан кораҥденыт. Но тылеч варат калык вӱд дене кужу жап кӱлын пайдаланен кертын огыл: тудыжо кран гыч чырге веле йоген да яндаржак лийын огыл.
Юл серыште верланыше тиде олашке журналист паша дене веле коштам да тыгодым сайжымат, удажымат ситышынак ужам. Но чонем кажне гана теве мо шотышто коржеш: Звенигово калык молан тынар орлыкым чыта? Тиде йодышым титаканым кычал муашлан огыл шындем, а амалым рашемдаш да тудым лийме семын писынрак кораҥдаш, калыклан сай да ласка илышым ышташ кӱлмым палемдынем.
М.ИВАНОВА
