Йоча-влаклан правовой полышым пуымо тӱнямбал кечын кышкарыштыже Кужэҥер районысо тӱвыра да каныме рӱдерыште «Ме пырля» йоча да ача-ава-влак клуб ушемын заседанийже эртен.
Тиде мероприятийыш Марий Элын Внутренний политике, верысе самоуправленийым вияҥдымаш да юстиций министерствыж гыч адвокат А.Яндулина, нотариус А.Бусыгин, профилактике системе службын пашаеҥже, ийготыш шудымо ӱдыр-рвезе-влак, тичмаш огыл ешым кучышо, шуко шочшым, аза але йоча пӧрт гыч налме, инвалид йочам ончышо ача-ава, опекун-шамыч толыныт. Ийготыш шудымо-влакын пашашт шотышто инспектор И.Егорован, ийготыш шудымо-влакын пашашт шотышто районысо комиссийын консультантше Г.Борисован докладыштым колыштыныт, законым сайын палыше-шамыч дене пырля йоча-влакын правашт дене кылдалтше ятыр йодышым лончыленыт.
М.ИВАНОВА.