11 декабрьыште Марий Элын тазалыкым аралыме министрже М.Панькова Козьмодемьянск оласе поликлиникын чоҥалтмыжым ончен лектын. Тиде тӧнежым больницын стационарже дене ушат.
Вашлиймаш годым Марина Викторовна подрядчик-влак дене мутланен, тымарте ыштыме пашам, тудым шуктымо графикым терген да лекше йодыш-влакым рашемден. Тӱҥ врач Николай Сидоров кабинет-влакын верланымышт да чоҥымо пашам мучашлыме нерген каласкален. Кызыт поликлинике кӧргым олмыктат. Курыкмарий ден Юрино районлаште илыше калыкым обслуживатлыше у тӧнежым 2020 ий шошым апрельыште почаш палемдыме.
У поликлинике пациент-влаклан пуымо медицине услугын качествыжым палынак саемдышаш. Тыгодым тудо регистратурын пашаштыже перегыше технологий, пациентын участковый врач деч специалист марте шумо корныжо да медицине услуго дене пайдаланыме жапым кӱчыкемдыме направленийла почеш у формат дене пашам ыштышаш.
М.ИВАНОВА
