ЛӰМГЕЧЕ

Шӱдӧ ийым от пу

10 декабрьыште Кугу Отечественный сарын ветеранже З.Курбатовалан 100 ий темын.

Зоя Васильевнам курымаш юбилейже дене Марий Элын социальный вияҥмаш министржын алмаштышыже Андрей Компаниец, Йошкар-Ола администрацийын еҥже-влак шокшын саламленыт, Россий Федераций президент Владимир Путинын лӱмжӧ дене саламлымашым, шарнымашан пӧлекым да пеледыш аршашым кучыктеныт.

 З.Курбатова 1919 ийыште Киров область Санчурск районысо Сметанино селаште шуко шочшан кресаньык ешыште шочын. Ачаже – Василий Наумов – колхозышто пашам ыштен, аваже – Евдокия Наумова – йоча-влакым ончен. Ешыште 11 икшыве, вич эрге да куд ӱдыр, кушкыныт. Рвезе-шамыч чыланат Кугу Отечественный сарыште вуйым пыштеныт. Зоя Васильевна аважым ок шарне, молан манаш гын кум ияшак тудын деч посна кодын.    

Ӱдыр церковно-приходской школышто ныл классым тунем пытарен, вара «У илыш» колхозышто пашам ыштен. 1942 ийыште Сталинград кредалмашын участникше, сусыргымылан кӧра армий радам гыч комиссоватлыме салтак Анатолий Курбатовлан марлан лектын. Ӱдырамаш колхозышто чодырам эҥер дене йоктарен колтымо пашаште тыршен гын, пелашыже врач-ветеринар лийын.

1970 ийыште Зоя Васильевна ден Анатолий Андреевич Йошкар-Олашке кусненыт. Тыште ӱдырамаш илышыжым торговльо дене кылден да йӧратыме пашаштыже сулен налме канышыш лекмыж деч варат кужу жап тыршен.

Зоя Васильевна кызытат пеш чолга да весела. Вачӱмбакыже 100 ийым пыштен манын отат шоналте: тӱнямбалсе чыла гаяк уверым пала, унамат кумылын вашлиеш – пеш поро шӱм-чонан ӱдырамаш. Тек тудо ончыкыжымат таза лиеш, шуко ила, лишыл еҥже-влакым куандара да шкежат нуным ончен йывырта.

М.ИВАНОВА

Опубликовать в Одноклассники

Добавить комментарий