11 декабрь гыч Я.Эшпай лӱмеш Марий кугыжаныш филармонийын директоржын сомылжым жаплан Александр Речкин шукташ тӱҥалын.
Але марте тиде культур учрежденийым М.Шкетан лӱмеш Марий национальный драме театрын вуйлатышыже Эрик Юзыкайн вуйлатен.
Саша Речкин — эстраде мурызо, Олык Ипай лӱмеш Кугыжаныш премийын лауреатше, «Речкин-бенд» группым чумырышо да тудын солистше.
Икмыняр ий тудо филармонийыште творческий паша шотышто директорын алмаштышыжлан тыршен.
Палемдыман, «Тӱвыра» национальный проект почеш Маргосфилармонийын у оралтыжым чоҥен шукташ кум ий жапыште Россий правительстве 316 млн 764 тӱжем теҥгем ойырышаш.
А.БАЙКОВА
