Йошкар-Оласе Дева Мариян площадьыштыже марий калык кочкышым темлыше у турист объект почылтын. Тиде — «Теплая речка» трактирын теремокшо, вес семынже изирак пӧртшо манашат лиеш. Тушто команмелнам, тӱрлӧ кӧрган подкогыльым, когыльым, лачка кочкышым, йӱышым авызлен да подыл ончаш йӧн уло.
Тений шошым мемнан республикым вуйлатыше Александр Евстифеев Йошкар-Олан мэрже Евгений Маслов дене пырля Изи Какшан эҥер сер да тудын дене кылдалтше кудыкысо инфраструктурым канаш келыштарыме йодышым верыш лектын канашеныт. Тунам регион вуйлатыше Йошкар-Оланан сынжым сылнештараш, шкенан калыклан канаш, ӧрдыж гыч толшо турист-шамычын кумылыштым налаш келшышыше условийым ышташ кӱлмо нерген ойлен.
Варажым оласе администраций пелен ты шотыштак пашаче группо ышталтын. Тудо энер серысе кумдыкышто калыкын кумылжым сывырен кертше вераҥдышашлык объект-влакын архитектур велым могай лийшашыштм палемден. Оласе кучемын темлымашыжыжым аукционыш луктыныт. Бизнес еҥ-влак тушко ушненыт. Теве ынде Дева Мариян площадьыштыже икмыняр у объект ышталтын.
Иктыже саде изи пурлмывер. Кодшо рушарнян шке омсажым почын. «Теплая речка» трактирын озаже-влак Иван ден Юлия Анитроповмыт тыгак аукционыш ушненыт да шонымашыштым илышыш шыҥдарен кертыныт. Ынде тиде изи пӧртыш пурен, марий кочкышым авызлен, чайым подыл каяш лиеш. Молодежный плитке, спорт да туризм министр Лидяи Батюкован палемдымыж почеш, тиде пурлымвер поснак турист-влалан келшышаш. Молан манаш гын ӧрдыж гыч толшо-влак тӱҥ шотышто верысе калыкын традиционный кочкышыштым авызлаш кумылан улыт. А тидыже оласе бюджетышкат мыняр гынат парышым кондаш полшышаш.
Пурлмыверым почмаште Л.Батюкова, олан мэрже Евгений Маслов лийыныт. Оза-влак тиде кечын изи пӧртыш пурен кайыше-шамычлан ятыр тамле да оҥай пӧлекым ямдыленыт. Лӱмын пайремлан ыштыме тортымат яра пуэденыт.
Ола администрацийын пресс-службыжын увертарымыж почеш, лишыл жапыште Изи Какшан эҥер серыште велопрокат, санитарный пункт, тыгак изи архитектур форман обьект-влак ешаралтшаш улыт.
С.НОСОВА
Авторын фотожо
