26 апрельыште марий калык Талешке кечым кумдан палемден. Марий тӱвыра рӱдер ты пайремлан пӧлеклалтше «Ший талешке» фестиваль-конкурсым эртарен. Ты гана тудо I Марий калык погынын эртымыжлан 100 ий теммылан да ӱдырамаш-талешкылан пӧлеклалтын.
Республикын 16 школжо гыч ӱдыр-рвезе-влак кугу сеҥымашке шушо ӱдырамаш-влакын илышышт, I Марий калык погынын историйже да ты погынын делегатше-шамыч нерген ойленыт. Фестиваль тӱҥалтыште Тӱвыра, печать да калык-влакын пашашт шотышто министрын алмаштышыже Г.Ширяева чылаштым эртыше пайрем дене саламлен да конкурсант-влаклан сеҥымашым тыланен.
Конкурсышто ончыктымо кажне паша шке семынже ойыртемалтын. Тунемше-влакын презентацийым ямдылымышт годым ятыр шымлымашым эртарымышт шижалтын.
Икте марий мер илышыште, тӱвыраште, шанче тӱняште кумдан палыме ӱдырамаш-талешке нерген каласкален гын, весе шке кундемыште палыме да суапле пашам шуктышо ӱдырамаш нерген презентацийым ямдылен. Мутлан, Кужэҥер район Коҥганур школ гыч Кристина Быкован М.Шкетан лӱмеш марий драме театрын артистше, Коҥганур кундемын шочшыжо Прасковья Смирнова нерген пашаже жюрилан моткоч келшен. Ӱдыр умбакыжат ты чапланыше актрисе нерген шымлымашым шуйынеже.
А теве Медведево район Юилейный школ гыч Ирина Григорьевалан пырля тунемшыже-шамыч полшеныт да презентацийым унам вашлийме йӱла дене тӱҥалыныт. Марий Турек районысо Сардаял школын тунемшыже Н.Сорокина ойыртемалтын. Докладшым верысе тӱвыра пӧртын пашаеҥже-влак «сӧрастареныт». Мурымаш ден куштымашышт конкурслан весела тӱсым пуртеныт, погынышо калыкым пырля мураш таратеныт.
Жюрилан эн сайжым ойыраш куштылго лийын огыл. Кумшо верым Йошкар-Оласе 14-ше №-ан гимназийын тунемшыже А.Атлашкиналан («Мурызо шочеш мураш». С Сушкина нерген презентаций) да Оршанке район Упшо школ гыч П.Ятмановалан («Упшо села гыч I Марий погынын делегатше-влак») пуэныт. Кокымшо верым Советский район Кодам школын тунемшыже В.Кушакова («Кугезе кумылан ӱдырамаш». Г.Щербакова нерген презентаций) ден Волжский район Кугу Корамас гыч Д.Михайлов («Кӱлеш тыге илаш – почеш кышам кодаш». Мардан Раян творчествыж ден илышыжым шымлыме паша) пайленыт. Икымше верым Кужэҥер район Коҥганур школын тунемшыже К.Быкова налын. Тудо ӱмаштат «Ший талешке» конкурсышто усталыкшым ончыктен. А гран-при ден кубок Медведево район Юбилейный школын тунемшыже И.Григорьевалан логалын. Ӱдыр Г.Шкалинан пашажым да илышыжым шымлен.
Л.ШАБДАРОВА.
М.Скобелевын фотожо.
