УВЕР ЙОГЫН

ЙЫЛМЕ – КАЛЫК ЧОН

Шочшо икшыве-влаклан вӱд гане тамле йылмым пугыче манын сӧрвалена.  
Марий кумалтыш мут

Шочмо йылмын чевержым, куатшым

Курык семын шогем арален.

М. Казаков

Марий йылмын лывырге вийже шинчам вӱдыжта.

С. Эсаулова.

.

«Айдемын койыш-шоктышыжым, тӱня умылымашыжым йылме дене кылдаш лиеш. Айдемын шочмо йылмыже могай? Тудо могай йылме дене шона, утларак кутыра? Нине йодыш-влаклан вашештымеке, палаш лиеш: айдеме шкенжым молан лач тыге, а вес семын огыл куча», – ойла филологий науко доктор, йылмызе, фольклорист, поэт, туныктышо, Йылмым, литературым да историйым шымлыше Марий институтын «Этнологий» направленийже пелен тӱҥ шанче пашаеҥже Любовь АБУКАЕВА (снимкыште). Таче тудо мыланна шочмо йылмынан ойыртемже, вийже, кӱлешлыкше нерген каласкала.

 

Тӱняште кызыт 7111 йылме уло (2018 ийыште Тӱнямбалсе йылме-влак каталог Ethnologue шотлымыж почеш). Мо дене вара йылме-влак икте-весышт деч ойыртемалтыт? Мутлан, марий йылме чоҥалтмыж дене моло финн-угор йылме да тюрк йылме-влак семынак агглютинативный (латынь гыч agglutinatio, рушлаже приклеивание). Мутын ужашыже-влак икте-весышт дене туге ушнат, пуйто лӱмӧ дене пижыктыме улыт. Кажне ужашыжын шкенжын значенийже да верже. А руш йылмым ончалына гын (шымлызе-влак чоҥалтмыжым шотыш налын, флективный (латынь гыч flectivus, рушлаже гибкий) йылме маныт), ик мут ужашак, мутлан, мутмучаш, шуко значениян. Садлан руш йылмым тунемаш куштылго огыл, тидым шымлызе-влакат пеҥгыдемдат.

Мутерышт денат йылме-влак ойыртемалтыт. Мутлан, саам йылмыште ийым да лумым ончыктышо 180 наре мут уло.

Марий йылме нерген ойлена гын, ме арален коденна грамматикыштына тугай формо да категорий-влакым, кудыштым руш йылме йомдарен. Мутлан, рушлаже собирательные числительные манына, кызытсе руш йылмыште кодыныт двое, троедесятеро марте веле. А умбакыже руш йылмыште тыгай чот мут уке, кеч ожныжо лийын. А марлаже чумыр тӱшкам ончыктымо годым ме манын кертына кеч латвизытын, кеч шӱдын, кокшӱдӧ кумлын да т.м.

Тыгай примерым шуко кондаш лиеш. Тугай йылме ойыртем-влак нерген ойлаш лиеш, кудышт  руш йылмыште улыт (мутлан, род категорий), а марий йылмыште огыт вашлиялт да, мӧҥгешла (мутлан, желательный наклонений). Икманаш, кажне йылме шке ойыртемже дене виян да поян. Тидым шинчымаш да умылен моштымаш йылмына дене кугешнаш амал веле огыл, тудым арален кодаш, вияҥдаш негыз.

          Шочмо марий калыкнан йылмым да мутым аклымыже да жаплымыже моткоч раш коеш: Мут – пеш кугу вий; Мут окса деч шерге – ойлалтеш калыкмутлаште (Калыкмут-влакым А.Е. Китиковын «Марий калыкмут мутер» (Йошкар-Ола: Мар. кн. изд-во, 1991. 336 с.) книгаж гыч да авторын картотекыж гыч налме). А кумалтыш мутым колышт лектына гын, ӧрын кугешнена докан: Теҥыз Ава, Вӱд Ава, вӱд гане поянлыкым пу, вӱд гане ташлыкым пу, вӱд гане кужу ӱмырым пу, шочшо икшыве-влаклан вӱд гане тамле йылмым пугыче манын сӧрвалена.

Поснак кугу вий семын аван мутшо аклалтеш: Мом ава йочаж нерген нылле ик гана каласа, тудо шукталтеш.

Мемнан кугезына-влакак паленыт: Йылмын ойжо – уш-акылын койышыжо. Марий мифологийыште йылме нерген тыге каласкалалтеш. Йылме умшаш кодмыжлан орланен. Тудо Юмылан тыге ӧпкелен ойлен: «Э, Юмем, айдемын уло капысе ужашыштымат тый пешкыдым ыштенат, нуно эре тӱжвалне койын шогат. Мыйым веле вес тӱрлын ыштенат. Мо языкем верч мыйым тыге ыштенат, Юмем, ойло мыланем! Вара мый тыйын тӧр ден тӧр огыл пуйырыметым шинчаш тӱҥалам». Ваштарешыже тудлан Юмо каласен: «Кок пырдыж-шамыч тыйым арален ашнаш тӧчат. Иктыже лу дене ыштыме пырдыж (пӱй-шамыч), весыже шыл дене ыштыме пырдыж (тӱрвӧ-шамыч). Тугак тиде пырдыж-шамыч тыйым чарен ышт керт: тый кӱлдымаш мутым кычкырет да ӧпкелен киет. Шонен ончо! Тыйым айдемылан моло ужашышт гай тӱжвалан ыштем гын, тый ала-мом ыштен пытарет ыле». (Марий калык ойпого: тоштыеҥ ой-влак. Йошкар-Ола, 1972. С. 26.).

Тугеже раш, кушечын тыгай калыкмутна-влак: Йылмылан сорлык уке; Йылмын печыже уке, чыла ойлаш лиеш.

Йылме – моткоч кугу вий. Тидын нерген марий калык ожнысек пален да самырык-влакым туныктен ойлен: Йылме чыла кертеш; Йылме курыкым савыра; Йылме – эн шучко явала; Йылме керде (кÿзö) дечат пÿсö. Керде але кӱзӧ кок тӱран, садланак калыкмут шижтара: Йылме – ойго, йылме – куан.

Палаш оҥай, кугезына-влакын шонымышт почеш, кунам йылме куаным конда, а кунам ойгым.

Йылмылан уста-влак нерген калыкыште тыге маныт: яклака йылман, йымыжа йылман, йылмыже порсын; Йылме мучашышкыже ӱйым шӱрымö; Йылмыже ÿй вочкыш чыкен лукмо гай. Ойлаш йомартле-влакын, маныт, йылмышт йымыжа, порсынлалтше, куштылгын да вашке рончылтеш, шӱмешетак логалеш. Нуно кутыраш кумылзак да тале улыт. Тыгай еҥ-влак, мутат уке, кеч-могай нелылык гычат йылмыштлан кӧра утлен кертыт. Таклан огыл калыкна палемда: Йылмыже огыл гын, ола корак шукертак чÿҥгал наҥгая ыле.

А вес могырым ончалына гын, йылмыштына тыгай ойсавыртыш-влакат улыт: мут оргаж, шомак ора, мут куктеж, йылмым тӱгаташ. Тыге лектеш: йылмылан аярын, уста шомакчын, ныжылгын ойлышын мутшо яра да эшеже йылмыже козыра лийын кертеш. Тыгай айдемылан вик ойлашат огыт вожыл: «Йылмыштет ӱй да йылме йымалнет ий» але «Йылмет яклака – чонет какляка». Я весылан шижтарат: йылмыже яклака, шÿмжö шуркала. Шкенжым кок тӱран кӱзӧ семын кучышо нергенат шуко калыкмут уло. Теве икмыняржым ончалына: йылмыж дене полша, ушыж дене йомдараш толаша; йылмыж дене суксо мутым ойла, кидше дене шем кишке пашам ышта.

Очыни, «мый чыла кертам / палем / моштем» манше еҥын йылмыже пашажым ончылта. Тыгай-влак нерген калыкыште ойлат: йылме дене теҥызымат кÿварлаш лиеш; йылме дене нöлпö пÿгымат тÿҥдаш лиеш; йылме дене нöлпö пудамат тумо оҥаш пудалаш лиеш; йылме дене кӱ полатымат опташ лиеш; йылмыж дене курыкым шалата, кидше дене шанчаш падырашым ок тарвате; йылмыж дене тыш-туш, пашаж дене нигуш; йылмыж дене – эн ончыч, пашаж дене – эн шеҥгеч.

Илышыште тыгай койышан айдемым вашлият гын, очыни, шоналтет: айдемын моторын ойлен моштымыжым чылаж годым кӱкшын аклаш лиеш мо? Шочмо йылмыштына улшо глагол-влак вашмут семын лийын кертыт. Синоним радамыште улшо глагол-влакым лӱмын руш йылмыш кусарен пуэна: лодымандылаш ‘говорить не по существу’; лӧргаш ‘болтать без удержу, тараторить’; ойлышташ ‘говорить, болтать; чесать языком, врать, лгать, привирать’; йылмылаш ‘болтать; говорить попусту’; йылмешташ ‘болтать; говорить попусту’; курыктылаш ‘1. болтать (языком), говорить вздорное. 2. врать, лгать, привирать’; вӱдылышташ ‘болтать, говорить несуразное, глупое’; лыгыртаташ ‘болтать, пустословить, трепаться, трепать языком, переливать из пустого в порожнее’; вӱдылышташ ‘болтать, говорить несуразное, глупое’; лӱлаш ‘перен. болтать, пустословить; трепаться, чесать языком’; пыльткаш ‘болтать языком’; кукташ ‘болтать, судачить, говорить не всегда толково или же достаточно разумно’; ляпкаш ‘1. болтать, наболтать, пустословить, трепать, молоть языком, чесать языком. 2. перен. лаять, гавкать’; ляҥгаш ‘1. болтать, трепать языком. 1. лаять’; поҥгыртылаш ‘перен. болтать, говорить всякий вздор; говорить насмешливо, неуважительно; унижать, унизить’. А эше диалектлаште улшо мут-влакым ешарена гын?..

Тугеже, тек айдеме ыштыраш йылман лиеш, тек тудын йылмыжат тӱкна, тек тудым эсогыл пун йылме манын лӱмдат, но чонжо яндар гын, мутшылан оза гын, тыгай айдемылан ӱшанаш лиеш. Очыни, тудо йылме пазар огыл, йылмыжым эрыкыш ок колто. Тыгай еҥ пала, кунам йылмым пидаш (пурлаш, суралаш) кӱлеш. А эшеже тыгай айдеме огеш умыло дыр йылмым тӱгаташ, йылмым рӱдаш, йылмым шумаш йӧратыше-влакым. Кеч луктын огеш каласе «Йылметше чылтак ляпишка» манын, но семынже шоналта чай: «Йылмыже ушкал шÿйыш оҥгыр олмеш сакаш веле йöра». Вет раш: шапырчыкын йылмыже канышым ок пале. Йӧра эше тыгайже пӱсӧ йыман але йылме когар огыл гын! А вет улыт тыгай-влакат: йылмышт пӱсӧ: вӱд гае мушкеш, шӱм-мокшышкет пура. Адакшым нуно мокталтен колтат, да шинчашт але йылмыш возеш. Эскерыман тыгай годым да ваштарешышт ойлыман: «Йылмет! / Йылметлан / Йылмешет (Йылме мучашешет кокша шочшо (лекше)!» але «Йылмешет кукшо кошарге (лийже)!». Ожныжо кугезе коча-кована-влак шкеныштым, икшывыштым але лишыл еҥыштым аралаш манын, йылме пурылтмым шӧрымӧ але моктымым шӧрымӧ мутымат пелештеныт.

А еҥ, порым шонен гына, сайым тылана гын, Йылмешет ÿй да мÿй манын вашешташ ида мондо.

Ойым вашталтымаш, чон почын кутырымаш мыланна моткочак шерге. Теве С.Г.Чавайнын возен кодымо калык мурышто чаманымаш шижалтеш:

Йылдырым-йылдырым комбет каяле,

Шӱльӧ пуашет ышна шу.

Йылдырым-йылдырым таҥна каяле,

Шогал мутланашат ышна шу

Тыгаяк чон шижмаш эрвелмарий калык мурышто:

Ай, о лий вет, о лий вет,

Йыле ужаш о лий вет.

Йыле ужаш лиеш гынат,

Ойлен шогаш о лий вет.

Таче, кунам ме чылажымат ыштен шукташ вашкена; телефон, скайп да моло йӧн дене пайдаланен гына мутланена, каласыме шуэш: вашлийын кутыраш жапым ида чамане, тендан дене ойласаш шонышылан «Жапем уке» манын, кумылжым ида кодо. Шоналтыза ынде, кызыт эсогыл кугу олалаште «Территория общения», «Антидискотека» лӱман клуб-влак почылтыт. Айдеме-влак мутланаш тунемыт: нуно мутын ямжым да тамжым шижнешт, кутырымын шотшым да радамжым умылынешт да тыге шканышт чон ласкалыкым пӧртылтынешт.

Йылмына дене пайдаланен моштымо шотышто шуко ойӧрӧ уло. Нуным шотыш налман, шкенан койышнам эскрыман. Мутат уке, южо ойӧрыжын кокымшо ужашыже кызытсе жаплан чылаж годым келшен ок тол, вет тыште тошто марийын илыш умылымашыже, но икымше ужашыж дене ӱчашен огына керт: Еҥ нерген шойыч удам ойлаш ок йöрö – умшат пужла; Еҥым шылталаш ок йöрö – шкаланет савырна; Еҥ дене вурседылаш ок йöрö – тÿсет шемемеш / Юмо савырнен шогалеш; Шоныде ойлаш ок йöрö – еҥ öпке вачышкет нелын возеш; Кугыеҥлан ваштареш ойлаш ок йöрö; Ача-авалан торжа шомакым ойлаш ок йöрö – пиалан от лий; Ача-авалан икшывым шудалаш ок йöрö – мутышт шуэш, эҥгек лиеш, икшывыштым йомдарен кертыт да тулеч молат.

Ойлат: йылме кажне каласалтдыме мут дене йомын толеш. Айста шочмо йылмынан вийжым, сылнылыкшым арален кодена. Кажне  шомакшым моштен да йӧратен кучылтына. Тиде статьянам калыкмут дене иктешлена,  вет тудо кӱчык, келге да моткоч раш: Йылме – калык чон.

 

Туныктышо-влаклан пайдаланашышт да лудшо-влаклан мутвундыштым пойдарашышт эше икмыняр материалым темлена.

Школышто тунемше-влаклан калыкмут, кӱэмалтше ойсавыртыш-влакым погаш да лончылаш темлен, оҥай шымлыме пашам возыкташ лиеш. Тек нуно шочмо йылмыштлан шӱман лийыт. А марий-йылмым тунемше-влак тудын ойыртемжым, куатшым, сылнылыкшым, поянлыкшым шижыт.

 

Мут – слово, разговор. Могай? Айда-лийже (вздорное), алал (доброе, желанное), амырчык (скверное), ашака (скверное), аяр (язвительное), äврӓт (поучительное слово, наставление), вашеш (ответное), игылчык (оскорбительное), иктешлыше (обобщающее), йӱкшыктыш (расхолаживающее), йыгыжтыш (отвратительное), йырнык (мерзкое), кочо (горькое, обидное), койдартыш (ехидное), койдарчык (насмешливое), кугешныме (самодовольное), кукшо (сухое), кÿлеш (нужное), кÿлдымаш (негодное), кӱлдымашлык (бесполезное), кӱлеш-оккӱл (глупое), кÿчык (короткое), моктаныме (хвастливое), негыздыме (необоснованное), нечке (нежное), ныжыл (нежное), ойлыдымо (невысказанное), ойыртемле (особое), осал (злое), пеҥгыде (крепкое), поро (доброе), пÿсö (острое), пытартыш (последнее), пытыдымаш (нескончаемое), рашкемыш (ясное), саламлыме (приветственное), сӧрал (красивое), торжа (грубое), тулаҥше (пламенное), тулдымо (подстрекательское), тура (резкое), тÿсан (яркое), тыриш-ториш (противоречащее), умдан (колкое), уто (лишнее), ушан (умное), ÿшандарыше (убедительное), чаманыме (сочувственное), чеверласыме (прощальное), шакше (скверное, неприличное), шолдыра (резкое, грубое), шояк (ложное), шучко (страшное), шӱктарыше (оскорбительное), шыде (злое), обманое), яп-яра (голое), яра (пустое)…

 

Шомак – слово. Могай? Алал (желанное), алгаштарыше (обльстительное), асам (неприличное), йÿштö (холодное), какляка (хитрое), келге (глубокое), келесыр (придирчивое), кере (правдивое), козыра (колючее), кочо (горькое), кумылзак (доброе), кÿлеш-оккÿл (нелепое), лавыран (грязное), ласка (ласковое, нежное), лыжга (нежное), моктымо (хвалебное), мыскылтыш (оскорбительное), неле (тяжелое), ныжыл (нежное), сай (хорошее), сӧрал (красивое), ойган (грустное), осал (злое), ораде (дурное), öкын (сожаления), öпке (обидное), поро (доброе), пуста (пустое), пÿсö (острое), пытыдыме (нескончаемое), сай (хорошее), сакыран (слащавое), семалыме (утешительное), сотарыме (язвительное), сулыкан (греховное), тор (дурное), тул (пламенное), тыр-тор (грубое), уда (плохое), умдан (колкое, букв. с жалом), умылыдымо (непонятное), уто (лишнее), уто-сите (лишнее), чон-кумылым лумен моштышо (способное загипнотизировать), чонло (душевное, отзывчивое), шолдыра (крупное), шуан (колючее, язвительное), шудалме (бранное), шӱрдылмӧ (бранное), шыде (гневное), яра (пустое), ятлыме (бранное)…

 

Мутланаш – разговаривать, говорить, беседовать. Кузе? Йомартлын (приветливо), йывышт (шёпотом), йышт (шёпотом), йыште-вушто (перешёптываясь), кугешныде (скромно), кугун (много), кужун (долго), кывыжге (шёпотом), кыжге (потихоньку), ласкан (нежно, ласково), лым лийде (без умолку), порын (по-доброму), торжан (грубо), тыматлын (учтиво), шолдыран (грубо), шӱм-кыл почын (откровенно, букв. раскрыв струны сердца), шыман (вежливо), чоным почын (откровенно), чон семын (по душам), шуко (много), эплын (тихо), эркын-эркын (тихо-тихо), ятыр (много)…

 

Кутыраш – говорить, разговаривать, беседовать. Кузе? Игылтшыла (насмешливо), йымыжан (ласково), йымыжгын (нежно), куштылгын (легко), ойырлыде (постоянно), ӧкымеш (неохотно), пыльгыжын (льстиво), сӧралын (складно), сырен (раздраженно), сырыде (без раздражения), татун (дружески), тептерын (толково), топкатан (решительно), тореш (перечить), торжан (грубо), тык-мук (запинаясь), умылышашын (доходчиво), ÿшанлын (убеждённо), шÿмын (душевно, сердечно), эскерыде (опрометчиво), эксыде (беспрестанно), яндарын (чисто)…

 

Ойлаш – говорить. Кузе? Айватын (хорошо), вашкен (спешно), ваштареш (наперекор), вестӱкын / вестÿрлын (по-другому), вик / вигак (прямо), йомартлын (приветливо, весело), йоҥгалтшын (звучно), йывыртен (радостно), йыжге / йывыжге (шёпотом), керын (гневно), кокытела (двусмысленно), кумдан (широко), кыдач-покшеч (путано), пашымлен (перебивая друг друга), пуштыртатыл (шамкая), пыкше (с трудом), радамлен (по порядку), рашкатан (ясно), селтын (хитро), сомынь (ошибочно, неправильно), сотарен (с сарказмом, ехидно), тореш (наперекор), тужын (громко), тура (откровенно), тургыжланышын (встревоженно), туштен (с намёком), тӱкнен (заикаясь), утыген (громко), ÿмбала (повторяясь), ӱшандарышын (убедительно), чояланен (с хитростью), шокшын (горячо), шоналтен (обдуманно), шуко (много), шуэн (медленно), шыде дене (со злостью), шыдын (зло), шыман (ласково), шыматыл (успокаивая), ызыра (напрасно), эпере (напрасно)…

 

Шомакче – оратор. Шомаклыше – выступающий. Мутызо – говорун, говорунья; любящий поговорить. Мутвундо – словарный запас. Мутсавыртыш – обороты речи.

Ойласаш (диал.) – говорить, поговорить, разговаривать, беседовать. Шомакланаш (разг.) – разговаривать, говорить; перен. ругаться, пререкаться. Шомаклаш (разг.) – говорить, выступать, рассказывать.

Мутлан пураш – соглашаться. Мутым пызырал лукташ – выдавить слово.  Мут лончым муаш – находить нужные слова.

 

А теве мутмастарна-влак йылмына нерген, кутырымына нерген кузе возат, лудын лекса.

«Мый, родем-влак, ойлаш тунемше омыл», – ончыко лектын, койынак чеверген, Васюк тӱҥалеш, ойлаш айманалтеш. А.Эрыкан.

(Ӱдырын) йодмыжлан вашешташ вуй шондыкыштем мут поянлык ыш сите. Йӧра эше, Миклай утарыш. Г.Чемеков.

Кукшо мут шерым вашке тема. А. Эрыкан.

Мутын тыге туран пӱтырналтмыжлан кӧра Суховлан кенета йӱштӧ вӱдыш пурен шогалмыжла чучо. А. Мурзашев.

Шомак саска кӧн серып, туто, а кӧн – куктештме мут оргаж. М.Емельянов.

Мутланат поян, кумылланат весела, ойлаш тӱҥалеш – кӱ чонымат пушкыдемда. И.Иванов.

Тудо (П.А.Кашков) ойлаш йомартле, йылмыже йымыжа, порсынлалтше, шӱмешетак логалеш. И.Иванов.

Кажне мутшым, изи чӧгыт дене пералтымыла рашкемден, ойлаш тӱҥале Лида. М.Казаков.

Ойлаш мом ок лий, йылме лудымо… Шырым шинчыман. А.Березин.

Шӱшпык йӱмӧ вӱдшым урзыш налын, подыл ончет гын, пышкем йылмет рончылтеш. К.Васин.

 

Г.КОЖЕВНИКОВА

 

Опубликовать в Одноклассники

Добавить комментарий