СПОРТ

Чемпион деч – мастер-класс

Эртыше кечылаште Йошкар-Оласе Россий Армийын культур полатыштыже верланыше комплексный единоборство дене спорт залыште  тӱнямбал кӱкшытан спорт мастер Полина Петухова дене тудын тренерже (Чуваш Республикын заслуженный тренерже)  Сергей Шабердин кикбоксинг дене мастер-классым эртареныт.  

Спортзал комплексный единоборствылан келыштаралтше. Кӱварыште ковёрым шарыме, пырдыж воктене икмыняр боксёр грушо кеча, кид вийым пеҥгыдемдаш туврашеш канатым келыштарыме… Зал йоҥгыдо.

Тушто Российын спорт мастерже Александр Шабердин тренировкым эртара. Шернур район Кугу Мушко ялыште ончыч вольный кучедалмашлан кумылаҥше рвезе шке опытшым самырык тукымлан пуаш тырша. Лач Александр Васильевичак уна-влакым йоча-шамыч деке ӱжын. Мыят ончыч тудын деке лишемым, икмыняр йодышым рашемдышым.

–  Александр Васильевич, Те икмыняр проектыш ушненда, сеҥенда. Паша вияҥеш? Коеш, таче мастер-классышкат моткоч шуко рвезе чумырген. Коклаштышт ӱдыр-влакат койыт…

– Чын. Эн ончыч «Спорт клуб по месту жительства» проектым сеҥен налынна. Тыге Йошкар-Оласе «Арена» манежыште секцийым почынна. Такшым кум проектыш ушненна. Кокымшыжо «Готов к труду и обороне» маналтын. Тудыж дене кумылан еҥ-влакым ГТО-м сдатлаш ямдыленна. Кумшо проектнаже «Школа территория здоровья» маналтеш. Тӱҥ шонымашыже – йоча-влаклан физкультур да спорт дене заниматлалташышт йӧным ышташ. Куяр школышто, Сеньканыште, Ежовышто комплексный единоборство дене таҥлалташ секцийым почмо.

Ноябрь тӱҥалтыште ты залыш матым налынна. Лишыл кечылаште ешартыш оборудованийым кондышаш улыт. Залыште общефизически ямдылалташат, комплексный единоборствылан кумылаҥдаш инвентарь ситышын. Тачысе кечылан тышке 100 утла еҥ тренировкыш коштеш. А шонымашнаже теве могай  – таза илыш-йӱлалан 200 наре еҥым кумылаҥдаш. Кугу спортыштат результат уло. Мутлан, ноябрь тӱҥалтыште Российын кубокшо верч таҥасымаште ӱдыр-рвезе-влак моткоч  сай результатым ончыктеныт. Шке тўшкаштышт Татьяна Парсаева ден Илья Лебедев икымшым, Юрий Яковлев кокымшым, Иван Юферев кумшо верым налыныт. А тӱнямбал кӱкшытыштӧ чемпион-влакын мастер-классышт секцийыш коштшо-влаклан ончыкыжым кыртмен ямдылалташышт эше ик шӱкалтыш лиеш, сеҥымашлан ўшан ешаралтеш. Вашлиймаште лекше йодышым рашемдашышт йӧн пуалтын. Мастар-шамыч деч йоча-шамыч у приёмым тунемыныт.

 

Сергей Шабердин, Чуваш Республикын заслуженный тренерже:

– Мастер-классым ончыктымо шотышто тренер Александр Васильевич дене ончылгочак кутырен келшенна. Жап чӱдылыклан кӧра кеҥежым толын кертын огынал, вет пел ий жапыште вич вере Россий, тӱнямбал кӱкшытан таҥасымашлаште лийынна.  Теве ынде йӧн лекте. Шонымашнаже йоча-влаклан опытнам пуаш, чын кучедалаш туныкташ, таза илыш-йӱлалан кумылаҥдаш. Жапыштым пайдалын эртараш тиде, мутат уке, пеш сай.

 

Полина Петухова, Чуваш Республикысе кугыжаныш университетыште химико-фармацептический факультетыштыже тунемеш. Кикбоксинг дене тӱнямбал кӱкшытан спорт мастер:

– Рингыш лекмеке, куштылгыжак огыл. Ты видыште пеш чытышан, пеҥгыде койыш-шоктышан лийман. Таче мастер-класс годым йоча-влакын лач тиде койышышт  шижалте. Шинчашт йӱла, кумылышт уло – тугеже результат лиеш. Нунын дене вашлияш оҥай ыле. Тыгай вашлиймашыже шке  кундемыштем икымше гана лийын.

 

П.Петухова, С.Шабердин дене интервьюм газетнан лишыл номерыштыже лудын кертыда.

Е.ЭШКИНИНА

Опубликовать в Одноклассники

Добавить комментарий