Россий МЧС-ын Марий Элысе Тӱҥ управленийыштыже «Созвездие мужества» фестивальын республикысе этапшым иктешленыт да сеҥыше-влакым палемденыт.
Торжественный церемоний управленийын актовый залыштыже эртен. Молгунамсе семынак тушто тыглай илышыште талешке койышым ончыктышо посна еҥ-влакым палемденыт. Нунын коклаште Россий МЧС-ын «За содружество во имя спасения» медальже дене палемдалтше Максим Гуляев, Петр Стрельцов да Павел Целиков лийыныт. Январьыште нине кум йолташ йӱлышӧ пӧрт гыч вич икшывым утареныт.
Пожарыште лӱддымылыкым ончыктымыштлан тыгак кум йолташ — Данил Скобелев, Роман Смирнов да Виктор Киселёв — Россий МЧС-ын Марий Элысе Тӱҥ управленийжым вуйлатышын Тауштымашыж дене палемдалтыныт. Мо улым кучылтын, талышныше тул ваштареш кучедалыныт. Пожарный-влакын толын шумешкышт, йӱлышӧ порт гыч погымат луктын шуктеныт. Нунын чулымлыкыштлан кӧрак оралтым тӱрыс арален коден кертме да тул воктен шогышо суртыш вончен огыл.
А шукерте огыл Кремль гыч вес куан уверат толын. Чрезвычайный ситуаций деч еҥ ден кумдык-влакым аралыме сферыште суапыштлан, тыгак службо пашаште сеҥымашке шумыштлан Марий аварийно-утарыше службын оперативный паша шотышто начальникшын алмаштышыже Николай Самойловым РФ Президентын Чап Грамотшо да ты службынак рӱдӧ аварийно-утарыше отрядшын утарышыже Владимир Соловьевым кугыжаныш вуйлатышын тауштымашыж дене палемдыме шотышто Россий Президент В.Путинын пунчалже лектын.
С.НОСОВА
