12 декабрьыште Сеҥымашын XXX идалыкше лӱмеш культур полатыште Россий калык усталыкын сулло коллективше, Олык Ипай лӱмеш Кугыжаныш премийын лауреатше, калык коллектив лӱмым нумалше мурышо да куштышо «Эрвел марий» ансамбльын концертше лиеш.
Тудо ты коллективын 30 ийым темымыжлан пӧлеклалтын.
«Эрвел марий» 1989 ийыште самырык-влакын «У вий» мер ушем пелен чоҥалтын. 1991 ий гыч ты коллектив Республикысе калык усталык да культур каныш паша шотышто шанче-методике рӱдер пелен пашам ышташ тӱҥалын да кок ий гыч калык лӱмым сулен налын.
Ансамбльым ынде ятыр ий Россий культурын сулло деятельже Тамара Дмитриева ден Марий Элын сулло артистше Борис Дмитриев вуйлатат. А репертуаржым муро дене пойдарымаште Марий Эл культурын сулло пашаеҥже Людмила Пашуткина тырша. Людмила Васильевна 1998 ий гыч коллективын участникше-влакым мураш туныкта.
Кумло ий жапыште «Эрвел марий» ансамбль Пошкырт, Удмурт Татарстан, Свердловск, Угарман, Пермь, Киров да моло кундемыште мастарлыкым ончыктен, тыгак Белоруссийыш, Венгрийыш, Финляндийыш да Эстонийышкат шуын, тӱрлӧ конкурсыш, фестивальыш ушнен да шукыж годым сеҥымаш дене пӧртылын.
Кызыт коллективыште – кумло утла участник. Нуно чыланат эрвел кундемын веле огыл, финн-угор калык-влакын тӱвыраштым, йӱлаштым аралымашке надырым пыштат.
А.БАЙКОВА
