3 декабрьыште Россий Федераций президентын Юл кундем федеральный округышто полномочный представительже Игорь Комаров Владимир Путинын кӱштымыж почеш Юл кундемыште илыше 21 еҥлан кугыжаныш наградым кучыктен.
Наградым налше-влак коклаште промышленность, транспорт, культур да искусство, социальный да финанс, медицине, образований да науко аланлаште, кугыжаныш службылаште тыршыше пашаеҥ, тыгак шуко шочшан ача-ава-влак Марий Эл гычат лийыныт.
Шернур район гыч Сергей ден Татьяна Шабдаровмытым «Родительский чап» орден дене палемдыме. Тиде ешыште шым йоча кушкеш.
«Сулен налме награде дене чыладамат уло кумылын саламлем. Тиде – надырланда кӱкшӧ ак. Те – тудо, кудын дене иктӧр лияш кӱлеш!» – манын Игорь Комаров.
«За заслуги перед Отечеством» орденын II степенян медальже дене Марий Эл гыч «Шернур сыр завод» ЗАО директорын алмаштышыже Владимир Кожанов палемдалтын.
Г.Константинов лӱмеш руш драме академический театрын артисткыже Наиля Сулейманова Марий Эл культур ден искусствым вияҥдымашке кугу надырым пыштен. Тудлан «Россий Федерацийын заслуженный артистше» почётан лӱмым пуымо.
«Кугыжаныш награде – элын сеҥымашланда акше, пашаланда, усталыкланда, Россий ден мер илышым пеҥгыдемдымаште кугу надырланда тауштымашыже», – манын Игорь Комаров да награде дене палемдыме еҥ-влаклан тазалыкым, пиалым, улан илышым тыланен.
М.ИВАНОВА
