Мемнан ласка илышна верч йӱдшӧ-кечыже военный-влак тыршат. Нунын кокла гыч иктыже — Морко кундем Кокласола (Коркатово) ялын шочшыжо Павел Васильев. Шукерте огыл тудын дене вашлийын мутланаш пиал шыргыже.
— Военный лияш кумылет кушеч лектын?
— Школ деч вара армийыш каенам. Красноярск кундем Ужур олаш Стратегий назначениян ракетный войскашке логалынам. Служитлыме жапыштак тиде аланыште умбакыже шкем вияҥдаш шонен пыштенам. Тыге 2013 ийыште контракт дене военный службыш, Марий Элыште верланыше, Кутузов орденан 14-ше Киевско-Житомирский ракетный дивизийышке пуренам. Тушто боевой управлений группын отделенийжын командиржылан налыныт. 2018 ийыште охране да разведке группыш кусненам. Тиде ийынак Моско олаш Россий Федерацийын Обороно министерствыжын кугыжаныш рӱдерышкыже пилот деч посна чоҥештылше аппаратым виктараш тунемаш каенам. Тиде самолётым, вертолётым, але дрон манмым тора гыч вӱдымаш. Тазалыклан, илышлан тудо нимогай эҥгекым огеш ыште. Изирак аппаратшым военный веле огыл, тыгак фотограф, учёный-влакат кучылтыт. Нунылан тыгай йӧн кӱшыч сниматлаш але айдеме логалдыме верым шымлаш кӱлеш. Мылам тиде пеш келша. Кызыт старший сержант улам.
— Военный паша куштылгыжак огыл. Могай нелылык вашлиялтеш?
— Каныш кечынат службыш ӱжыктен кертыт. Ондак тиде йӧсын чучеш ыле, ындыже тунем шуынам. Тыгак йӱштӧ ма, шокшо ма, ме постышто лийшаш улына. Южгунамже тылзе денат чодыра гыч огына лек. Частем Марий Элыштак улмылан кӧра каныш кечылаште мӧҥгӧ ава-ача дек миен толаш йӧн уло. Тидыже сай.
— Армийысе йолташ кокласе келшымаш могай?
— Марий Эл гыч служитлаш 26 салтак кайыме ыле. Шукышт дене кызытат вашлиялтына, эртыше жапым шарналтена. Пырля служитлыше рвезе-влак денат кылым йомдарыме огыл, серышым вашла возена, телефон дене кутырена. А пашасе йолташ-влак дене иза-шольо гай лийме.
— Илышыште мо эн тӱҥ?
— Мыйын шонымашыште тиде еш. Кеч-могай жапыште эҥерташ йӧршӧ еҥ-влак воктенет улыт гын, тиде – пиал. Шочмо мландым аралыме годым шке лишыл йолташемын, ача-авамын ласкалыкышт верч тыршем манме шонымаш чоным ырыкта.
О.МОШКИНА
