УВЕР ЙОГЫН

Йот уна-влаклан Марий Элыште пеш келшен

Российыште аккредитацийым эртыше йот журналист-влак кодшо кечылаште Марий республикыште уна лийыныт.

Нуно регион вуйлатыше Александр Евстифеев денат вашлийыныт. А.Евстифеев республикнан поянлыкше да сеҥымашыже, моло регион дене кылым кучымыж нерген уна-влаклан каласкален.

Тиддеч посна республик вуйлатыше палемден, 2020 ийыште Марий Эллан — 100 ий. Кугу лӱмгечым палемдаш республикна чотак ямдылалтеш: архитектур памятник-влак уэмден олмыкталтыт, социальный да культур объект-влак чоҥалтыт. Кундемнан вияҥашыже Россий президент Владимир Путинын кӱштымыж почеш национальный проект-влакат йӧным ыштат.

Уна-влакат А.Евстифеевлан тӱрлӧ йодышым пуэныт. Нуныштлан регион вуйлатыше уло кумылын вашештен. «Руш йылме дене пашам ыштыше организаций-влакын Бельгийысе федерацийышт» интернет-порталын тӱҥ редакторжо Сергей Протасов А.Евстифеев деч йот элыште илыше россиян-влакым Российыш илаш кусарыме программе республикыште кузе шукталтме нерген йодын.

– Тиде программе почеш Марий Элыш 986 участник да нунын ешышт толыныт. Тиде Украинын, Узбекистанын, Казахстанын, Таджикистанын, Арменийын, Азербайджанын, Молдовийын, Киргизийын, Беларусь Республикын, Туркменистанын да Грузийын гражданже-влак улыт, – вашештен регион вуйлатыше.

29 ноябрьыште уна-влак Э.Сапаев лӱмеш опер да балет академический театрыште лийыныт. Эн ончычак нуно театрым ончен савырненыт, а вара залыште органым колыштыныт. Тиде ю шӱлышан француз семӱзгарым Арсений Ушков шоктен. Уна-влак руш ден марий произведенийымат шокшын вашлийыныт.

Тиддеч вара нунын дене мутым вашталташ йӧн лийын. Иран телеканалын операторжо Вадим Ильин шӱлалташат ярсен огыл, съёмкым ыштен. А Иран телеканалын корреспондентше (Эквадорын гражданинже) Торрес Миньо Кристиан Элой, Вьетнам радион шеф-корреспондентше Ньы Ань Ту, Китай телекомпанийын корреспондентше Сун Яо журналистикыш толмо корнышт да шуктен шогымо пашашт, шкешт нерген кӱчыкын да оҥайын каласкаленыт.

– Школышто тунемме годым мый кусарыше лияш шоненам, вет тунам мемнан дене школышто руш йылме чапланен ыле, но институтым тунем лекмеке, радиош журналистым пашаш налме шотышто таҥасымаш эртыме нерген уверым колынам. Тушко мыят ушненам. Паша моткоч келша. Тиде профессийым налме дене тӱня мучко ончен кошташ йӧн уло, – палемден Ньы Ань Ту. – Мый эрыкым йӧратем, кушко шонем, тушко каен кертам. Руш йылмым жапше годым тунеммылан тачат шкемым тауштем, шуко материалым передачым ямдылен кертам. Российым моткоч йӧратем, сандене тендан тӱвырам, йӱлам пагалем.

– Ачам – кугу спортын, футболын, комментаторжо. Эше вич ияш улмем годымак пеленже мероприятийыш коштыктен. Лу ияш улмем годым диктор семын тыршаш тӱҥалынам да тидак журналистикыш каяш шӱкалтышым ыштен, – палдарыш Торрес Миньо Кристиан Элой.

Йот уна-влак чыланат рушла сайын мутланат. Нунылан Марий мландыште лияш моткоч келшен да Российын Вес элла дене паша шотышто министерствыжын тыгай йӧным ыштымыштлан куанен тауштышт.

– Тыште чылажат пеш сӧрал. Национальный президент искусство школышто, Евсеев лӱмеш национальный тоштерыште, Козьмодемьянскыште, Сыр лапкыште да моло вереат лийме шуко жаплан шарнаш кодеш. Республикын рӱдолажат пеш мотор, тудо кугу огыл, йырваш ару. Калыкшат тыште поро, унам вашлийын моштышо, пашаче да талантан. Теве искусство школышто кӱслем могай мастарын шоктышт! Сандене шкенан деке кайымеке, Марий Эл нерген шуко ойлена, – чонжым почо  Сун Яо.

Сун Яолан кучыктымо «Марий Эл» газетат кугу пӧлек гаяк лие.

– Лудын ом керт гынат, журналист-влакын пашаштым, савыкталтше фотокартычке-влакым ончен лектам, – воштылале йот уна.

Икманаш, кум кечаш пресс-тур йот уна-влаклан республикнан кочкышым ыштен лукшо организаций-влакын пашам ыштымышт, ялозанлык вияҥме, калыкнан тӱвыражым да йӱлажым арален кодымо да спортын вияҥмыж нерген шуко пален налыныт веле огыл, лач нине теме дене нуно шке кундемыштышт радио, телевидений гоч каласкалаш тӱҥалыт.

Алевтина БАЙКОВА

Опубликовать в Одноклассники

Добавить комментарий