1 майыште Звенигово районысо Кокшайск селаште, верысе тӱвыра пӧрт ончылно, «Шокто, гармонь, такмак, йоҥгалт» черетан фестиваль эртен.
Тушко пӱтынь район гыч гармоньчо ден такмакым йонгалтарыше-влак чумыргеныт. Погынышо-влакым район администрацийын тӱвыра отдел вуйлатышыже Л.Михайлова саламлен.
Фестивальыште Звенигово район администраций вуйлатышын призше дене Василий Федоров палемдалтын. Кокшайск ял шотан илем администрацийын призшым уста гармоньчо да мурышо семын чапланыше Евгений Филиппов сеҥен налын. Тӱвыра пашаеҥ-влакын профсоюзыштын районысо организацийышт Геннадий Васильевлан пӧлекым кучыктен.
Тиде фестивальым вес гана эртараш эстафетым Какшамарий ял шотан илемлан пуэныт.
Л.Камалетдинова.
