Эртыше кечылаште «Марий Эл» ий полатыште «Дружба» футбол командын участникше-шамыч дене вашиймаш лийын. Тушто Марий Элын молодёжный политике, спорт да туризм министрже Л.Батюкова да ты футбол командын штабше эртыше тургымышто «Приволжье» зонышто модшо-влакын выступленийыштым акленыт.
«Дружба» футбол командым 2019 ийыште чумырымо. Модшо-шамыч самырык улыт: нуным тӱҥ шотышто олимпийский резерв училище да футбол ден спорт школ гыч ойырымо. Теве лач ты состав дене республикнан чапшым араленыт.
– Но те начаржак огыл результатым ончыктенда. Умылем, кумылда волышо. Тыгодым кугешнен палемдем: моткоч неле лийын гынат, мучаш марте модында. Иктешлымаш таблицыштат пытартыш одал, а тидыже мом-гынат ойла, – мане нунылан Л.Батюкова.
Футбол командылан оксам лач республикын бюджетше гыч гына ойырымо. Чумыр налмаште – 4,3 миллион теҥгем. Министрын палемдымыж почеш, тудыжо футбол пасум айлаш, медосмотрым эрташ, спорт экипировкым налаш, судья-влакын пашаштлан да взносым тӱлаш каен.
«Дружба» футбол команде 2019 ийыште III любительский лигын первенствыштыже 15 команде коклаште 14-ше верым налын. Чылаже 6 гана сеҥышыш лектын, 1 гана ничьям ыштен да 21 гана модын колтен (мече ойыртем: 38-100). «Приволжье» кубок верч таҥасымаште 20 команде коклаште пытартыш верыште лийын. Тидыже марий футболын историйыштыже ик эн начар результат семын палемдалт кодеш.
Но футбол тургымым УОР-ын директоржо А.Сидоркин, командын начальникше С.Зимин, «Дружба» командын капитанже А.Рудалёват сай велым гына палемденыт.
Ты команде «УОР-СШОР» лӱм дене тений Марий Элын чемпионатыштыже таҥасен. Индеш команде коклаште шымше верыш лектын, а Марий Элын кубокшо верч таҥасымаште чемпион лийын.
Е.ЭШКИНИНА
