20 ноябрь гыч 1 декабрь марте Г.Константинов лӱмеш руш драме академический театрыште руш театр-влакын «Мост дружбы» XVI фестивальышт эрта.
Тушко Юл кундем федерал округысо да Йӱдвел Кавказ гыч коллектив-влак ушненыт.
Фестиваль жапыште ончыкталтше ик спектакльыш И.Палантай лӱмеш культур да искусство колледжын студентше-влакат миеныт. Лач нуно «Театральное Приволжье» фестивальын участникше улыт. А тиде арнян «Театральное Приволжье» фестивальын Юл кундем федеральный округышто сеҥыше-влакын лӱмышт пале лиеш. Йӱклымаш 30 ноябрьыште 13 шагатлан мучашлалтеш. Ӱдыр-рвезе-влак Чебоксар гыч толшо коллективын «Тёмные аллеи» (И.Бунин) спектакльжым онченыт, артист-влак дене вашлийыныт, а варажым критик-влакын спектальым каҥашымаште лийыныт.
Тидын шотышто «Театральное Приволжье» фестивальын регионысо этапшын финалистше, тӱвыра да сымыктыш колледжын студенткыже Наталья Васильева тыгерак палемден:
— Спектакльым каҥашымаште лийме шуко кӱлешаным пален налаш полша. Тыгодым шке шонымашым профессионал-влакын дене таҥастараш лиеш. Тыгай вашлиймаш пайдале, оҥай.
— Кок фестивальынат участникше-влаклан тыгай вашлиймаш кӱлешан, — палемден Г.Константинов лӱмеш руш драме академический театрын режиссёр-постановщикше Иван Нецев. — Поснак шке илышыштым театр, актёр паша дене кылдаш шонышо-влаклан тыгайже пайдале. Ме ӱшанена, профессионал-влакын ойлымо шомакыштым нунат ушышкышт пыштат да ончыкыжым шке пашаштышт кучалташ тӱҥалыт.
А.БАЙКОВА