КУЛЬТУР ДА ИСКУССТВО

Ялыште – «Щелкунчик»

«Тӱвыра» национальный проектын «Культур алан» регионысо проектше  полшымо дене республикыштына икмыняр культур пӧртыштӧ уэмден олмыктымо паша ышталтын. Нунын коклаште Марий Турек район Кугу Карлыганат шотлалтын.

Шукерте огыл тушто чыла пашам мучашленыт да уэмдыме тӱвыра полат 22 ноябрьыште уэш шке омсажым почын.

— Тиде кечым калык чот вучен, сандене почмашке изижге-кугужге рӱж погыненыт. Пайрем кас поро шӱлыш дене эртен, — палемден тӱвыра пӧрт вуйлатыше Наталья Иванова. — Уэмдыме у полатым балет дене почынна. Тидланже ӱшаныме гаят ок чуч. Ты кастене верысе калык Эрик Сапаев лӱмеш опер да балет академический театрын «Щелкунчик» балетшым ончен кертын.

Ялысе тӱвыра пӧртын сценыштыже балетын куштен кертмыж нерген эше кеҥежымак республикын тӱвыра, савыктыш да калык паша шотышто министр Константин Иванов ойлен ыле. Ындыжым ял калыкат балет искуствым ончен да аклен кертеш.

А.БАЙКОВА

Опубликовать в Одноклассники

Добавить комментарий