18-22 ноябрьыште Москваште эртыше «Абилимпикс» V национальный чемпионат гыч Марий Элын делегацийже шым награде дене пӧртылын.
17 еҥан командыште кугу ийготан куд инвалид, инвалидностьян кум школьник да шинчымашым пуымо профессиональный организацийлаште тунемше кандаш студент лийыныт.
Тыге, Индустрий да предпринимательстве колледжын студентше Даниил Молотов «Предпринимательстве» компетенцийыште икымше верым налын, Сокыр-влакын всероссийский обществыштын Марий республиканский организацийыштын еҥже Елена Аппакова – «Крючок дене пидмаш» компетенцийыште кокымшо верым, тиде организацийынак еҥже Алевтина Петрова – «Име дене пидмаш» компетенцийыште кокымшо верым, Арда профессиональный техникумын студентше Максим Саракеев «Кермычым оптымаш» компетенцийыште кокымшо верыш лектын да тиде компетенций дене Россий сборныйын составышкыже логалын, Инвалид-влакын всероссийский обществыштын Марий республиканский организацийыштын еҥже Владимир Яковлев «Системный администратирований. «Специалист» категорий» компетенцийыште шийым налын, Марий политехнический техникумын студентше Андрей Лебедев – «Пум пӱчкедымаш» компетенцийыште кокымшо верым, Медведево гимназийыште тунемше Наталья Репина «Экономике да бухгалтер учёт» компетенцийыште кумшо верыш лектын.
Ушештарена, «Абилимпикс» V национальный чемпионатын финалже 20-22 ноябрьыште Москвасе ВДНХ площадкыште эртен. Тиде – инвалидностян да начар тазалыкан граждан-влакын профессиональный мастарлыкыштым вияҥдыме кугу событий. Таҥасымаш 62 тӱҥ да 31 презентационный компетенций дене эртен. Участник-шамычын мастарлыкыштым 500 утла эксперт аклен. Национальный чемпионатыште элнан 85 регионжо гыч 1800 утла еҥ участвоватлен.
М.ИВАНОВА
