УВЕР ЙОГЫН

 Йоласалыште  вӱдвакш лиеш

Курыкмарий районысо Йоласал Мастарлык пӧрт пелен «Вӱдвакш» этнокультурный вакш комплекс лиеш.

Тиде шонымашым илышыш шындараш Россий Президентын грант конкурсыштыжо сеҥымаш полшышаш. Проектым Мастарлык пӧрт Марий Элысе  «Тӱвыра поянлыкым арален кодаш полшышо обществе» региональный мер организаций дене пырля ямдыленыт. Грантын кугытшо ик миллион теҥге деч утларакыш шуэш.

Вакшым нӧлтымӧ пашажым тений кеҥежым тӱҥалыныт. Тидлан ты районысак  Шӹргӹял да Йынготы ялла гыч аралалт кодшо вакш оралте-влакым рончен конденыт. Йоласалыште нуным угыч оптен шогалтеныт. Ончылгоч палемдыме почеш, вакшын механизмже-влак ик вӱдорава деч пашам ышташ тӱҥалыт.

Вакш станокын ик ужашыже тыгак ямде. Молыжым эше погаш кӱлеш. У ий марте тушто оралте-влакым ик леведыш йымаке пуртен шуктынешт. Вара тошкалтышым, омсам келыштарат. Сандене моло пашам оралте кӧргыштӧ телым шукташ палемденыт. Но чылажымат вес кеҥежым мучашлаш палемдыме. Тунам проектыште палемдыме семынак, ты вӱдвакшыште пырче гыч ложашым йоҥышташ, межым кыраш, пырням пӱчкаш да обрабатыватлаш, тыгак йытыным кыраш да йоҥышташ, тудын гыч ношмӱйым темден лукташ тӱҥалыт. Икманаш, чыла тидыжым марий калыкнан акрет технологийже почеш шукташ палемдыме.  Ты пашалан тунемаш кумылан-влакымат туныкташ йӧн лектеш.

С.НОСОВА

Опубликовать в Одноклассники

Добавить комментарий