Волжский районысо Приволжский посёлкышто физкультурно-тазаҥдыме комплексым умбакыже чоҥаш проектно-сметный документаций шотышто экспертизым 31 декабрь марте ыштен шуктат.
Тидын нерген Марий Элын молодёжный политике, спорт да туризм министрже Л.Батюкова ойлен.
– Проектно-сметный документацийым ончен лекме шотышто контрактым ыштыме. 25 ноябрьыште эксперт-влаклан аклашышт пуэна. А 9 январь гыч чоҥаш подрядчикым кычалаш тӱҥалына, – мане Лидия Александровна. – Кызыт паша график почеш эртаралтеш. Таче кечылан тушто инженерный сетьым шотыш кондымо, оралтын тепловой контуржым петырыме, электромонтажный пашам шуктымо. Вӱдым, газым пуртымо, тулым, шупшмо шотыштат паша ышталтеш. Марий Элын 100 ияш лӱмгечыжлан Волжский районысо калыклан ты спорт объектым почын шукташ чыла йӧным ышташ тыршена. Спорткомплексыште ияш бассейнлан кугу ден изи чаше, тренажер зал, футбол, волейбол, баскетбол дене модаш 1 тӱжем утла квадрат метр кумдыкан спортзал лийшаш.
Приволжскийыште ФОК-ым Марий Эл вуйлатыше А.Евстифеевын кӱштымыж почеш 2020 ий ноябрь марте чоҥен шуктышаш улыт.
Ушештарена: ты ФОК-ым 2012 ий ноябрьыште «Газпром – детям» программе да Марий Элыште физический культур ден спортым вияҥдымаш кугыжаныш программе почеш чоҥаш тӱҥалыныт, а 2016 ий февраль тылзын финансирований укелан кєра паша чарнен.
Кызыт «Газпром» гыч регионнан бюджетышкыже 70 миллион теҥге пурен. Эше 75,5 миллион теҥге 2020 ийын икымше кварталыштыже лийшаш.
Е.ЭШКИНИНА
