Йошкар-Олаште Машиностроитель ден Суворов урем-влак ушнымаште светофор объектыш шукерте огыл эше ик секцийым келыштареныт.
ГИБДД-ын кӱштымыж деч вара кеҥежым ты корнывожышто йолешке-шамычлан вончаш лӱмын верым ыштеныт. Тылеч вара ты верыште чыла велымат «пӱялалтын» чумыргымылан кӧра корнывож турам автотранспорт-влаклан кудал эрташ нелырак лийын.
«Сигнал» муниципал предприятий вуйлатыше А.Жуковын ойлымыж почеш, шуко транспорт кужун шогымо чырым кораҥдаш асфальтыш ешартыш кудалыштме полосам ыштыме гынат, сӱрет садак сай велыш утыжым вашталтын огыл. Ты корнывожышто транспорт йогыным шуэмдыме вес сай йӧным муаш кӱлын.
Ынде тысе урем-влак ушнымаште шогышо светофор объектыш транспорт йогыным регулироватлыме эше ик секцийым ешареныт. Светофорысо фазым вестӱрлын вашталтмылан кӧра Суворов урем вел гыч шола могырыш савырнаш ешартыш йӧн лектын. Кызыт ешартыш секцийын чӱкталтын-йӧрталтмыжлан кӧра ты урем гыч лекше автомашина-шамыч, тӱҥ корно дене толшо транспорт йогыным «лугыде», маневырым ыштен шуктат.
Р.ЧЕПАКОВА
