УВЕР ЙОГЫН

«ОТР» каналыште – «МЭТР»

«ОТР» (Российын мер телевиденийже, цифровой эфир телевиденийын икымше мультиплексшын 9-ше кнопкыжо) телеканалыште «МЭТР» телеканалын программыже-влакым ончыкташ тӱҥалыт. Кызыт технический пашам шуктат. Вашталтыме параметран телесигналым регионыштына эфирыш 18 гыч 19 ноябрь йӱдым пуат.

Проектым илышыш пурташлан кызыт цифровой эфир телевещанийын сетьшым угыч радамыш кондат. Специалист-влакын ончылгоч шижтарымышт почеш, сигналын параметржым вашталтымылан кӧра южо модель приемникыште настройко шӧрлен кертеш. Тыгодым телеканал-влакым кид (ручной) але автоматический настройкыла полшымо дене радамыш кондыман. Тидым шке семын ышташ огеш лий гын, 32-11-99 номеран телефоныш йыҥгыртен, шокшо линийын специалистше-шамыч деч полышым йодман. Поснак неле ситуацийыште волонтёр-влак телезрительын мӧҥгышкыжак мият.

«МЭТР» телеканалын регионысо передачыже-влакым «ОТР» телеканалыште эрдене 6 гыч 7 шагат марте да кастене 18 гыч 19 шагат йотке ончыкташ палемдыме.

Эше ик гана ушештарена, 18 гыч 19 ноябрь йӱдым цифровой телесигналын трансляций параметрже гына вашталтеш, регионысо телеканал эше ончыкташ огеш тӱҥал. Трансляций тӱҥалме нерген ешарен увертарена.

М.ИВАНОВА

Опубликовать в Одноклассники

Добавить комментарий