17 ноябрьыште Перинатальный рӱдерыште Жап деч ончыч шочшо йоча-влакын тӱнямбал кечыштым икымше гана палемденыт.
Лугыч шочшо йочалан ош тӱняшке 2,5 кг деч изи нелытан да 37 арняш деч ончыч толшо аза шотлалтеш. Тыгайже планетыштына ий еда 15 млн. еҥыш погына, да кокла шот дене кажне луымшо аза жап деч ончыч шочеш. Йошкар-Олаште кажне латкудымшо аза – жап деч ончыч шочшо. 2017 ийыште ош тӱняшке толшо 6329 аза гыч 369 йоча лач тыгай лийын, 2018 ийыште 5775 аза гыч – 361 икшыве.
Организатор-влак пайремыш жап деч ончыч шочшо икшыван 20 ешым ӱжыныт. Ава-шамыч медик-влакын азам ышташ, лугыч шочшо йочаштым йол ӱмбаке шогалташ полшымыштым порын шарналтеныт, кызытсе илышышт нерген каласкаленыт. Весела аниматор-шамыч йоча-влаклан тӱрлӧ конкурсым, модышым эртареныт, пӧлек дене куандареныт.Перинатальный рӱдерын тӱҥ врачше Н.Сушенцов азам жап деч ончыч ыштыме ойыртем, лугыч шочшо йочан да тудын ешыжлан тӱткышым ойырымо кӱлешлык дене палдарен, тыгак 2020 ий шошым тӧнеж пелен кӱкшӧ технологиян корпусым чоҥаш тӱҥалме нерген ойлен.
Мероприятийым кавашке ош шарым колтен мучашленыт.
М.ИВАНОВА
