Ялозанлык да перерабатыватлыше промышленность пашаеҥ-влакын кечышт
Кодшо кугарнян Эрик Сапаев лӱмеш опер да балет театрыште Ялозанлык да перерабатыватлыше промышленность пашаеҥ-влакын кечышт лӱмеш торжественный погынымаш эртен.
Пайремыш республикнан чыла луклаж гыч ончыл пашаеҥ, вуйлатыше ден специалист, ветеран-влак погыненыт. Пасушто шурным ончен куштышо, ферме ден комплекслаште вольыкым ончышо, цехлаште кочкыш продуктым ямдылыше-влакым саламлаш Марий Эл Республикым вуйлатыше А.Евстифеев толын. Нунылан вий-куатыштым чаманыде, кече еда лым лийде тыршымыштлан тауштен, пашаштышт у кӱкшытыш шуаш, шукырак шылым, шєрым, пакчасасакам ыштен налаш тыланыш.
Александр Александрович республикын агропромышленный комплексшын тенийысе паша саскаж дене палдарыш. Марий Элын экономикыштыже ялозанлык кугу верым айла, тудын сату ужашыже коло процентыш шуэш. Тений индеш тылзыште АПК 47 миллиард теҥгеаш продукцийым ямдылен. Ялозанлык продукцийын индексше 110,7 процентыш шуын. Тидыже — Юл кундем федерал округышто кокымшо вер. Пырчым, пареҥгым, пакчасаскам шукырак ыштен налме, вольык ончышо-влак сай лектыш дене тыршеныт. Ме шкаланна шылым 349,1 процентлан ситаренна, муным – 110,4, пареҥгым – 118,4, пакчасаскам – 116 процентлан. Тугеже ятыр сатум єржыжкє пайдалын ужалышаш улына. Пасушкына йытын уэш пєртылеш. Тений тудым 906 гектарыш ӱдымӧ, шушаш ийын ик тӱжем гектарыш шукташ лийме.
Тений отрасльыште шумо сеҥымаш-влак радамыш «Шєртньє шыже – 2019» 21-ше Россий агропромышленный выставкыште республикын кумло медальым сеҥен налмыжымат пуртыман. Ялозанлыклан кугыжаныш могырым пасу пашалан да вольык озанлыкым вияҥдаш изи огыл полыш пуалтеш. Марий кугыжаныш университет пелен «Ростсельмашын» комбайн заводшо дене пырля ончыкылык специалист-влакын шинчымашыштым келгемдаш тунемме классым почмо.
Республикын правительствыжын ик тӱҥ пашажлан ялыште илыше-влакын илыме условийыштым саемдымаш шотлатеш. Регион вуйлатыше икмыняр примерым кондыш. Тений Параньга район Элпанур ялыште жаплан келшыше у школ омсажым почын, Оршанке посёлкышто спортшколым сайын ачалыме. «Ял кундем-влакым икшырымын вияҥдымаш» федерал программе дене келшышын, идалык мучаш марте 21 километр газ сетьым шупшын шуктат. Яллашке вич корно ышталтеш. «Тӱвыра» нацпроект почеш вич районышто тӱвыра пєртым ачалат. «Тазалык» нацпроект почеш Оршанке район Марково ялыште ФАП чоҥалтеш.
Мемнан ончылно кочкыш продуктым шкалан веле огыл ситараш, єрдыж эллашке экспортым кугемдаш задаче шындалтеш, каласен пытартышлан регион вуйлатыше да погынышо-влаклан пашаштышт у кўкшытыш шуаш тыланен, кугыжаныш наградым кучыктен. «РФ ялозанлыкшын сулло пашаеҥже» чап лўм дене Шернур районысо «Земледелец» озанлыкын механизаторжо С.Клепиков палемдалтын. «Марий Эл Республикын ялозанлыкшын сулло пашаеҥже» лӱмым Советский районысо «У илыш» колхозын презе ончышыжо Г.Богданова, У Торъял районысо «Первый май» колхозын презе ончышыжо Л.Корчемкина, Медеведво районысо «Марийский» ЗАО-н механизаторжо А.Кузнецов, Марий Турек районысо «Хлебниковский» ООО-н механизаторжо В.Наумов, Морко район «Передовик» артельын механизаторжо А.Оразаев, Медведво ялозанлык управленийым вуйлатыше А.Жахбаров сай пашашт дене сулен налыныт. Тылеч посна А.Евстифеев ятыр еҥлан правительствын Чап грамотым, республик вуйлатышын тауштымашыжым кучыктен.
Ял калыкым профессиональный пайремже дене Кугыжаныш Погын председатель А.Смирнов, Марий Эл Республикыште тӱҥ федерал инспектор П.Журавлёв, ялозанлык да продовольствий министр А.Гречихо, «Ростсельмашын» «Комбайн завод» ООО-жын еҥже А. Репин саламлышт да Чап грамотым, туштымашым кучыктышт. Республикыште шурным поген налмаште эн сай лектышыш шушо район, тӱшка озанлык, посна еҥ-влакын лӱмыштым ойлышт да наградым кучыктышт. Эн сай лектышыш Медведево район, тиде район гычак «Шойбулакский», Волжский районысо «Москва», Курыкмарий районысо «Деметра» озанлык-влак шуыныт. А эн шуко пырчым Медведево районысо «Шойбулакский» племзавод гыч А.Лебедев ден С.Смирнов, Волжский районысо «Москва» озанлык гыч С.Сергеев шийыныт. Пасу гыч идымыш эн шуко пырчым Медведево районысо «Семёновский» госплемзавод гыч О.Золотарёв ден Советский район Ленин лӱмеш колхоз гыч Е.Макаров шупшыктеныт.
Пайрем кумылым «Марий Эл» ансамбль ден Эрик Сапаев лӱмеш опер да балет театрын артистше-влак нєлтальыч.
В.СМОЛЕНЦЕВ
М.Скобелевын фотожо.
