ЙӰЛА МАРИЙ ЙӰЛА

Кугезына-влакак палемденыт

Октябрь мучаште Марий Эл правительстве вуйлатышын икымше алмаштышыже М.Васютин Марий юмыйӱла пашам виктарымаште лекше йодыш шотышто вашлиймашым эртарен.

Тушто Марий юмыйӱла ушемын тӱҥ онаеҥже А.Таныгин,  вуйлатышыже А.Смирнов, «Ош кече» фондым вуйлатыше В.Головин да учредительже-влак гыч иктыже И.Степанова, Марий Элын культур, савыктыш да калык паша шотышто министрын алмаштышыже Г.Ширяева,  Кугыжаныш Погын вуйлатышын алмаштышыже Е.Кузьмин (МарНИИЯЛИ директор), депутат-влак Л.Яковлева да Н.Пушкина (Марий культур рӱдер директор), шымлызе-шамыч кокла гыч историй науко кандидат-влак Н.Попов ден Р.Чузаев, филологий науко доктор Л.Абукаева, культурологий доктор Г.Шкалина, Оньыжа Э.Александров да молат лийыныт.

Марий юмыйӱла велке тӱткыш кажне кечын гаяк шукемеш. Иктыже ты йӱлам кучаш кумылаҥеш гын, весышт – утларак эскераш да уто-сите ынже лийын кае манме деч шекланаш тырша. Чынак, чылажат шот-рат дене лийшаш да икте-весылан эҥгекым ыштыде шукталтшаш.

Юмыйӱланам у кӱкшытыш нӧлталаш кӱлмӧ нерген эше 100 ий ожно Марий калык погынышто мутланеныт, тудым вияҥдаш задачым шынденыт. Пытартыш 20-30 ийыште тидын шотышто ятыр шукталтын. Курым ончычак фондын кӱлешлыкше нерген мутым луктыныт. Тудат ынде ышталтын.  Ындыжым Марий юмыйӱла ушем ден фонд икойыш шуын пашам виктараш тӱҥалыт: ушем тӱҥ шотышто – юмыйӱла пашам, фонд – тӱрлӧ проектым илышыш шыҥдараш шийвундым йӧнештарыме сомылым … А ыштышаш пашаже чылалан сита. Марий юмыйӱла ончыкылык тукымлан аралалт кодшо манын, тудым жаплан келшышын умылтарен, радамлен, науко велым  шымлен иктешлышаш улына. А тидланже онаеҥна-влакат, шымлызе-шамычнат, кумылат уло.

С.ПЕХМЕТОВА.

Авторын фотожо.

Опубликовать в Одноклассники

Добавить комментарий