УВЕР ЙОГЫН

Чавайнын лӱмжӧ кылден

4 ноябрьыште Марий Эл вуйлатыше Александр Евстифеев Йошкар-Олаште лӱмлӧ марий сылнымут классикна С.Г.Чавайнын лӱмжӧ дене кылдалтше уэмдыме кок объектым почын.

Тиде кече республикыште илыше калыклан кок пачаш пайрем лийын: ик велымже — Калыкын икоян кечыже, вес велымже Марий автономийым ыштымылан 99 ий темын. Пайрем мероприятий-влак олаште илыше калыкын ик эн йӧратыме вержым — уэмден тӱзатыме Чавайн бульварым — почмаш гыч тӱҥалын. Тиде паша «Тачысе илышлан келшен толшо оласе кумдыкым тӱзатымаш» программе кышкарыште шукталтын. Тидлан кӧрак Йошкар-Олаште ласкан канен, йолын коштмо зоно ышталтын. Тротуарыш брусчаткым пыштыме, асфальт-бетон шартышым угыч шарыме, бордюрым келыштарыме, бульвар мучко энергийым аныклыше, кызытсе жаплан келшыше лампе ден светильник-влакым вераҥдыме. Еҥ-влаклан шинчын каналташ олымбал ситышын. Тыгак лӱмын леведыш дене петырыме модмо зоно-влакым келыштарыме. Тушто икшыве-шамычлан модаш йӧнан лийже манын, мландыш резине пудыргым шарыме.

Бульварыште шкешотан у светофорымат ужаш лиеш. Тудыжо гаджетым ончен ошкылшо-шамычлан келыштарыме манман: корныштак стоп-линий гай палдырна, светофор семынак ыштыше сигналжым вуйым нӧлталде ужаш лиеш. Тыгак бульварыште икмыняр вере лӱмын пу брус гыч нӧлтымӧ левдышан кугу беседке семын ыштыме оралте-влак улыт. Тушто кеҥежым кече деч, а моло пагытыште йӱр, лум деч шылаш лиеш. Тыгай оралтыже кастене да йӱдым  светодиодный лампе дене волгалтеш.

Каласен кодыман: бульварым уэмден олмыкташ кӱлешлыкым олаште илыше-влак шкешт палемденыт. Тӱшка калыкын пайдаланыме кумдыкшым тӱзаташ кӱлмым рейтинг гоч ойырымо годым еҥ-влак лач тиде пашалан шукын йӱкым пуэныт. Ӧраш нимолан, вет бульвар ола покшелне вераҥын, сандене тушто эре калык шуко. Поснак тудым коляскым шӱкен коштшо ава, каналтен шинчаш лекше илалше еҥ-влак йӧратат.

Бульварым уэмдыме пашам республик вуйлатыше Йошкар-Олан мэржын пашажым жаплан шуктышо Евгений Маслов дене пырля ончен лектын.  Ыштыме паша 44 миллион теҥгеш шуын. Ончыкылан тушто эше видеооборудованийым вераҥдышаш да ужартыме пашам шуктышаш улыт.

Пайрем вашеш С.Г.Чавайн лӱмеш калыкле лудмыверымат олмыктымо пашам мучашленыт. Тудымат  республик вуйлатыше ончен лектын. А пашаже чынжымак кугу лийын, вет ынде лудмывер оралтын тӱжвал сынжат, кӧргыжат вашталтын. Эшежым ынде библиотекыш тазалык шотышто начар улшо еҥ-влаканат пурен лекташ йӧнан. Олмыктымо паша 60 миллион теҥгеш шуын. Регион вуйлатышын пунчалже дене тидлан эше республикысе правительствын резерв фондшо гыч ик милион теҥге ешарен ойыралтын. Таче тудын фондшо 1 миллион утла экземплярым арала. Кажне ийын тушко 30 тӱжем лишке еҥ лудаш коштеш. Тений тушто лачшымак библиотекын конференц-залжым олмыктымо, сокыр-влакым обслуживатлаш зоно ышталтын.

Регион вуйлатыше тыгак С. Г.Чавайнлан пӧлеклалтше кабинетымат ончал лектын. А теве олмыктымо лудмо кугу залым ончалмеке, палемден, тиде площадкыште республикын 100 ияш лӱмгечыжлан пӧлеклалште мероприятий-влакымат эртараш лиеш. Чынжымак, ты залын архитектуржым эше 1938 ий гычак арален кодаш тыршат.

С.НОСОВА

Опубликовать в Одноклассники

Добавить комментарий