Шукерте огыл Киров областьыште пӱртӱс лоҥгаште спортивный туризм да кычалме-утарыме паша шотышто «Вятке пӱчо» чемпионат эртен.
Марий Эл гыч тушто Йошкар-Оласе специализированный пожарно-утарыше частьын командыже шке вийжым терген да икымше верым сеҥен налын. Командын участникше-влак коклаште ты часть начальникын алмаштышыже Илья Глазырин, мастер-пожарный (утарыше)-влак Андрей Гладышев ден Дмитрий Яковлев да старшина Валентин Булыгин лийыныт. Кокымшо ден кумшо верыш Киров ден Перьмысе турист-спортсмен-влак лектыныт. Таҥасаш неле лийын, возат рвезе-влак соцлаштыкыштышт. Шуко экстремальный ситуацийыш логалыныт, игечыжат начар шоген. Мемнан кундем гыч мийыше командылан полек шотеш тиде таҥасымашлан лӱмын ямдылыме 15 килограмм нелытан пӱчым кучыктеныт.
Снимкыште: Марий Эл гыч мийыше команде.
С.НОСОВА
