6 ноябрьыште «Калтаса ӱжара» газет интернетысе официальный сайтышкыже тыгай уверым шынден: «…Мишкан районысо Метрялыште илыше кок еҥым «мыскара банк билет» дене пайдаланыше мошенник ондален.
Чылажат тений 31 октябрьыште лийын. Ик пенсионер деке палыдыме пӧръеҥ пурен да кок агытанжым 800 теҥге дене ужалаш йодын. Суртоза тудын дене келшен. Ондалкалыше пӧръеҥ кок сурткайыклан 5 тӱжем теҥгеаш «кагаз оксам» пуэн, агытан оза тудлан 3600 теҥгем пӧртылтен.
Кокымшо случаят тиде кечынак лийын. Икымше семынак, илалше пенсионер деке палыдыме пӧръеҥ пурен да кок тагажым ужалаш йодын. Кажныжым 4000 теҥге дене акленыт. Мошенник сатужлан тиде ганат 5 тӱжем теҥгеаш «мыскара банк билетым» да 1 тӱжем теҥгеаш 3 чын кагаз оксам пуэн.
Аферистын толын кайымыжым умылымеке, пенсионер-шамыч районысо МВД пӧлкаш вуйым шийын миеныт.
Тиде факт шотышто уголовный делам тарватеныт.
Калтаса районышто илыше пагалыме еҥ-влак, Башкортостан Республикысе МВД чыладамат тӱткӧ лияш йодеш. Пачерышкыда ма пӧртышкыда палыдыме еҥым ида пурто, тылеч посна шергакан арверда-влак улмо нерген ида каласкале. Осал шонымашан еҥ-шамыч чӱчкыдынжӧ шкет илыше пенсионер-шамычым ондалкалат. Тидын шотышто лишыл еҥда-влакымат шижтарыза».
Пошкудо республикыште лийше нине случай икымше да, очыни, пытартыш огытыл. Тыгайже мемнан денат лиеда, сандене палыдыме еҥ-влакын трукышто толын лекмышт годым тӱткӧ лийманак.
М.ИВАНОВА
