КРИМИНАЛ

ПРЕСТУПНОСТЯТ, КОРНО АЗАПАТ ШАГАЛЕМЫНЫТ

Марий Эл Республикын Элкӧргӧ паша министерствыштыже 2016 ийын икымше пелыжым иктешленыт. Коллегийын заседанийыштыже Марий Элыште Тӱҥ федерал инспектор П.Логинов лийын.

Эртыше куд тылзым иктешлыше докладыштыже Марий Эл Республикын элкӧргӧ паша министрже В.Косарев регионышто преступностьын палынак шагалеммыжым, ты шотышто Юл кундемыште эн пытартыш верыште улмым палемден. Тидыже элкӧргӧ паша орган-влакын правам пудыртымо шотышто профилактике пашам сайын шуктымышт дене кылдалтын. Икымше пелийым иктешлымаш ончыктен: Марий Элыште преступность кандаш процентлан шагалемын, тыгодымак Юл кундемыштат, элна мучкат тудо палынак шукемын.

Преступленийым почмо показателят начар огыл  – 67 процент. Тидыже Юл кундемыште нылымше, Российыште 28-ше верлаште улмым ончыкта.

Республикысе корнылаштат палынак ласка лийын – корно-транспорт азап 19,5 процентлан шагалемын, а колышо-влак кодшо ийын икымше пелыж нарак кодыныт. Профилактике мерым кучылтмо дене йӱшӧ водительын титакшылан кӧра лийше корно-транспорт азап кум пачаш иземын.

М.ИВАНОВА.

Опубликовать в Одноклассники

Добавить комментарий