УВЕР ЙОГЫН

Уэмдат, чоҥат, вияҥдат…

31 октябрьыште Марий Элым вуйлатыше Александр Евстифеев Кугыжаныш совет президиумын кумдаҥдыме заседанийыштыже лийын. Тудым Россий президент Владимир Путин вӱден.

Вашлиймаште тазалыкым аралыме аланым вияҥдыме йодышым лончыленыт. Элым вуйлатышын палемдымыж почеш, пытартыш ийлаште здравоохраненийыште шуко мом ыштыме. Сай вашталтыш семын калыкын ӱмыржӧ кужеммым ончыкташ кӱлешан: 2014 ийыште тудо кокла шот дене 70,9 ий лийын гын, тений августлан 73,6 ийыш шуын. Тыгодымак калык здравоохраненийын качествыжым кӱкшынжак огеш акле, поснак – первичный звенон пашажым. Элым вуйлатыше тиде аланын икмыняр ситыдымашыжымат палемден, мутлан, калыкын первичный звенон тӧнежлашкыже шонымо семын логалын кертдымыжым.Тылеч посна ФАП, врач амбулаторий, поликлинике, районысо больнице-влак кокла гыч ятырынже пеш тошто, диагностический оборудований дене начарын шыҥдарыме да кадрлан нужна улыт.

Кодшо совещаний ден правительствылан пуымо кӱштымаш-влакым иктешлыме почеш, тазалыкым аралыме первичный звеном уэмдыме принцип-шамычым пеҥгыдемдыме. Нунын негызеш Россий Федерацийын субъектше-влак 2020 ий 10 январь марте региональный программыштым ямдылышаш да 1 июль марте пеҥгыдемдышаш улыт.

Марий Элыште тений «Здравоохранений» национальный проект кышкарыште Оршанке районысо Марково ялыште у ФАП чоҥалтеш. Регионысо поликлиникылаште «перегыше производство» да пациент-влакым виктарен колтымо мероприятий-влак шыҥдаралтыт. Тылеч посна республикысе больнице-шамычлан куснылшо 11 медицине комплексым налме, тышечын 10 единице техникым уже шындыме. Онкологический ден шӱм-вӱргорно службо-влакын оборудованийыштым палынак уэмдаш палемдыме.

«Здравоохранений» нацпроектым илышыш пурташ республикысе тазалыкым аралыме системылан тений идалык мучаш марте 1 млрд. 839 млн. теҥгем колтат.

Тазалыкым аралыме алан ончылан шындыме задаче-влак кокла гыч тӱҥлан первичный звеном уэмдыме региональный программым ямдылыме да илышыш пуртымо, ялысе ФАП-шамычым интернетыш ушымо, кӱкшӧ технологиян медицине полышым шукырак пуымо, паллиативный медицине полышым умбакыжат вияҥдыме да моло паша шотлалтыт.

Эн ончычак Перинатальный рӱдерым уэмден олмыктымо, тудын пелен кӱкшӧ технологиян корпусын пристройжым чоҥымо йодышым ончаш кӱлеш. Пытартышым шушаш ийын чоҥаш тӱҥалаш палемдыме.

М.ИВАНОВА

Опубликовать в Одноклассники

Добавить комментарий