«Социальный стратегий да тактике мер институт» поро кумыл фонд ден Москва олан Писатель-влак ушемже «Панацей» Х всероссийский конкурсым тӱҥалме нерген увертарат.
Конкурсын тӱҥ цельже калыкын тӱткышыжым здравоохраненийын проблемыже, таза илыш йӱла велыш савырымашке, Россий президент В.Путинын да правительствын здравоохранений ончылан шындыме задачыштым илышыш шыҥдарымашке, тыгак СМИ-ште медицине пашаеҥын кӱлешлыкшым почын пуымашке, тудын профессийжым чапландарымашке виктаралтын.
Конкурсыш посна автор, усталык коллектив ден группо, районласе да олаласе СМИ, редакций коллектив, тыгак шке изданийым лукшо коммерческий огыл организаций-шамыч 2018 ий 1 сентябрь гыч 2019 ий 31 октябрь марте печатлалтше пашашт дене ушнен кертыт.
Конкурс «Верысе эмлымвер», «Ош халат», «Еҥ-влак – азапыште», «Тазалык тыйын кидыштет», «Социальный чер лийшаш огыл» номинацийла дене эрта.
«Панацей» конкурс» манын палемден, конкурслык материал ден йодмашым 2019 ий 1 декабрь марте тыгай адрес дене колтыман: 125009, Москва, Моховой урем – 9, МГУ-н журналистике факультетше. Тел.: +79037235921, е-mail: isst@bk.ru, сайт: https://www.msu.ru.projects/isst/.
Сеҥыше-влакым 2020 ий мартыште Москваште саламлат.
М.ИВАНОВА
