Мемнан кундемна ий гыч ийыш тӱзлана. Марий Элым самырык тукым илаш, пашам ышташ йӧнан верлан шотла мо? Айста пален налына.
Денис Зыков, Советский район:
— Мемнан дене ару юж. Экологий шотыштат чыла сай. Тӱвыра поянлык, йӱла-влак, эсогыл марий калыкын юмыйӱлажат аралалт кодыныт. Экономикат вияҥ толеш.
Алина Хорошавина, Шернур район:
— Айдеме тиде илышыште чонлан келшыше пашам муэш гын, кушто верланымыже тӱҥ огыл. Тудо чыла вере шке мастарлыкшым ончыктен кертеш.
Евгений Пирогов, У Торьял район:
— Марий Эл — пеш мотор да сӧрал вер. Но тыште пашадар пеш изи. Тиде амаллан кӧра шукышт Йӱдвелыш але Москваш коштыт. Южышт туштак кодыт.
Эльвира Рыжова, Морко район:
— Кызыт самырык ӱдыр ден рвезе-влаклан шкем вияҥдаш ятыр йӧн уло. Тидым элнан тӱрлӧ кундемыштыже ышташ лиеш. Тӱҥжӧ – чонлан келшыже. А йӧратыме пашам Марий Элын иктаж районысо ялыштыжат уло кумылын ышташ лиеш.
О.МОШКИНА