Марий Эл Радиом яллаштат, олалаштат шукын куанен колыштыт. Ме радио гоч шуко еҥ, тӱрлӧ увер дене палыме лийына, пайдале да кӱлешан каҥашым налына. Калыклан шочмо йылме дене лекше передаче, увер-влак оҥай лийышт манын, радиожурналист-влак, чынжымак, чот тыршат. Нуно колыштшо-влак дене пеҥгыде кылым кучат, вашлиймашке ӱжыт.
Таче икмыняр журналист дене палымым ыштена. Лач нунын йӱкыштым кажне кечын радио дене колына.
Марий Эл Радион тӱҥ редакторжо – Владимир Матвеев. Волжский район Отымбал ялын чолга эргыже майыште 30 ияш лўмгечыжым палемден, ешан, кум икшыван (кок ўдыр, ик эрге) радиошто 2007 ий гыч пашам ышта. Тӱрлӧ передачым вӱден, а таче кечылан тудын «Ӱмыргорно», «Тиде кечын» эртарыме передачыжым калык куанен колыштеш. Владимир радиошто лийше икмыняр вашталтыш дене палдарыш.
– Тений икмыняр у проектым илышыш шыҥдарена. Мутлан, «Эр Чолпан», «Мый – радиовӱдышӧ». Кокымшышкыжо кумылан кажне еҥ ушнен кертеш. Нунылан шкеныштым вӱдышӧ семын терген ончаш йӧн пуалтеш. Вес ийын радиолан 15 ияш лӱмгечылан пӧлеклалтше чыла районышто 15 вашлиймашым эртараш шонена. Поснак – фанклуб-влак дене. У пашаеҥ-шамычат улыт. Тиде – Марий Элын сулло артистше Артём Асмаев да Егор Фёдоров.
Эртыше кечылаште радиош Ирина Якаева пєртылын. Тудо вўдышє семын пашам ышта. Кеҥеж каныш деч вара «Илыш дене тєр», «Марий Эл – мыйынат шочмо вер», «Онар тукым», «Ӱстел сий», «Спортзал» передаче-влак эфирыш уэш лекташ тӱҥальыч. Калык «Кеч ўшане, кеч уке» передачым куанен колыштеш. У кокла гыч «Мурызо Эчан деке унала» передачым палдарыман. Тушко лӱмлӧ артист-влак толыт, оҥай йодышлан вашештат.
Нелылык уке манашат лиеш. Но реорганизаций деч вара мыланна тошто оборудований куснен, сандене техникым уэмдыме шуэш ыле. Теве лач тидлан кєра южгунам эфирна окшакла, чыгынен колта. Кажне районышто передатчик уло, нунат тоштемыныт. Тӱҥ налмаште паша процесс шке радамже дене кая. Колыштшо-влакын йодмыштым шукташак тыршена. Палемдыман: марий йылме дене передаче-влак огыт шагалем, жапат ок изем.
Е.ЭШКИНИНА
Е.ЭШКИНИНА
