Тыгай лӱман выставкым Россий художник ушемын Марий Элысе пӧлкаже кажне ийын шыжым эртара. Ты гана тудо 29 октябрьыште Республикысе изоискусство тоштерыште почылто.
Тушто Марий Эл правительстве председательын икымше алмаштышыже Михаил Васютин, тӱвыра, савыктыш да калык паша шотышто министр Константин Иванов да молат лийыныт.
— Республикнан шочмо кечыж вашеш иктаж 60 ий наре «Марий кундем» выставке эртаралтеш. Тушко тӱрлӧ ийготан сӱретче-влак шке пашаштым ончаш да аклаш луктыт. Нунын гоч ме республикыштына сӱрет сымыктышын вияҥмыжым ужын кертына, — палемден Михаил Зиновьевич да Марий Эл правительстве председательын лӱмжӧ дене чылаштым шушаш пайрем-влак дене саламлен.
— Выставкыште опытан художник-влакын веле огыл, изоискусствыш икымше ошкылым ыштыше-влакынат пашаштым ужын кертына. А тыгайже, мутат уке, нунылан кушкаш полша, — каласен К.Иванов.
Выставкыште И.Ямбердовын, З.Лаврентьевын, Е.Ярановын, С.Алдушкинын, Б.Маклашинын, В.Чеботкинын, Т.Кольцован, А.Санникован, И.Малышеван, Р.Федосееван, Д.Махновецын, С.Поповын, Е.Кретининан тӱрлӧ жанр (графике, живопись, скульптур, декоративно-прикладной искусство) дене ыштыме кажне паша кумылым нӧлта. Сӱретлаште Марий мландынан мотор вершӧржым, сылне пӱртӱсшым, ойыртемалтше пӧрт, чапланыше еҥже-влакым ужын кертына.
Российын сулло сӱретчыже Иван Ямбердовын «Мӱкш тӱня мари», «Оньыжа» радынаже-влак шуко нерген шонаш таратат гын, Марий Элын сулло художникше Борис Маклашинын «Бобровое место», «Весна на Рутке» да моло радынаже-влакат кундемнан сылне пӱртӱсшӧ дене кугешнаш ӱжеш. А Российын калык сӱретчыже Зосим Лаврентьевын «Весна Победы. 1945 год» сӱретше Кугу Отечественный сарыште сеҥымылан пӧлеклалтын.
— Тиде пашам 2009 ийыште ыштенам. Сар тӱҥалме годым икымше классыш тунемаш пуренам ыле, сандене тудын кочо тамжым мыят шижын шуктенам. Илыш неле, кочкаш нимо лийын огыл. Мӧҥгӧ толшо почтальон деч лӱдынна, трук ойган уверым конда, шоненна. Ачам сарыште лийын. Фашист-влак ваштареш кредалме годым тудо нелын сусырген, госпитальыште кужу жап киен. Тӧрланымекыже, тудым Пермьыш служитлаш колтеныт. Мӧҥгӧ 1947 ийыште веле пӧртылын. Авам колхозышто пашам ыштен. Изам дене коктын авамлан полшаш тыршенна, вольыкым онченна, колхозлан киндым пыштенна, шкемын секретемат лийын: киндым коҥга гыч лукмо деч 15 минут ончыч ӱмбачынже уржа ложашым йӱштӧ вӱдеш лугымо вартыш дене йыгенам. Тыге киндын ӱмбалже мотор, чевер «чуриян» лийын. Эх, кӱэшт лукмо киндемже могай тамле ыле! — ойла Зосим Фёдорович. — А кызыт тиде сӱрет радынам ончем да йоча пагытем шинчавӱд йӧре шарналтем.
Полина Метелькован «Йошкар-Ола» пашаже кумылым савыра. Тудо республикнан рӱдолаштыже улшо мотор памятникше-влакым чай сервизыш сӱретлен.
А.БАЙКОВА
М.Скобелевын пашаже
