Екатеринбургышто кум кече шуйнышо «Корно-2019» тӱнямбал специализированный выставкышке 8 тӱжем еҥ ушнен.
Пашаштышт шумо кӱкшыт да лектыш дене Российысе 50 регион гыч, тыгак Китай, Швейцарий да Чехий гыч 250 наре компаний палдареныт. Экспозиций 11 тӱжем наре квадрат метр кумдыкым айлен. Тушто 530 экспонатым ончыктеныт. «Екатеринбург-ЭКСПО» тӱнямбал выставочный рӱдерын кумдыкыштыжо Марий Элын стендшат лийын.
Выставкын икымше кечынже «Лӱдыкшыдымӧ да сай качестван автомобиль корно» нацпроектым илышыш пуртымылан пӧлеклалтше совещаний эртен. Тудым РФ правительстве председатель Дмитрий Медведев вӱден. Совещанийын пашашкыже РФ министр, Кугыжаныш Думо депутат, регион вуйлатыше-влак да икмыняр моло ушненыт.
Форумын деловой программыж дене келшышын чылаже 20 утла мероприятий: «йыргешке ӱстел», семинар, дискуссий, секций-влакын заседанийышт, конференций – эртеныт.
Л.КАМАЛЕТДИНОВА
