Салам лийже, «Марий Эл» газет редакций. Биологически чолга ешартышым йӱаш тӱҥалнем, но начар качестван сату логалме деч шекланем. Каласыза, пожалуйста, БАД-ым налме годым мом палыман?
О.Никитин.
Йошкар-Ола.
Йодышлан Марий Элысе Роспотребнадзор виктемын пресс-службыштыжо тыге вашештышт:
– БАД-ым тыгай сынан сатум ужалаш санкционироватлыме верлаште гына налза. Мутлан, аптекылаште, аптеке шотан кевытлаште, киосклаште, диетический сатум темлыше специализироватлыме кевытлаште, кочкыш сату кевытласе лӱмын ойырымо отделлаште, секцийлаште да киосклаште…
Сай качестван БАД-ын этикеткыштыже лийшаш:
· сатун лӱмжӧ;
· продукцийым ямдылышын сату знакше (уло гын);
· Российыште да СНГ эллаште ямдылыме БАД-ын нормативный да технический документацийже-влак;
· сатун составше;
· БАД дене пайдаланыме тӱҥ ойыртем (амал)-влак;
· сатун нелытше але кугытшо;
· тазалыклан зияным ыштен кертмыже;
· «БАД эмлан ок шотлалт» манын ушештарыме;
· сатум ыштыме, тудын дене пайдаланаш лийме жап;
· аралыме йӧн;
· потребитель деч претензийым налме адрес.
М.ИВАНОВА.
