але Оксагалташ пышташ темлыдыме кӱлешан вич наста.
Уке гын, вучыдымын кугу азапыш логалын, окса да тазалык дене кылыдалтше нелылыкыш логалаш лиеш.
- Оксакалтам, кокланже кид гыч сумкажымак мучыштарен куржмо случай-шамычат шоктат. Оксам, чыла банк картым пелен коштыктен, пырля иканаште йомдарен кертме лӱдыкшӧ кугу. Тунам нуным кажныжым иканаште блокироватлаш але банкыште угыч ыштыкташ жап кӱлеш, уто паша ешаралтеш. А мӧҥгыштӧ кеч ик карт кодеш гынат, онлайн-банкинг йӧн дене йомшо гыч кидыште улшыш кусараш ӱшан кодеш.
- Пӧлек шотеш пуымо сертификат-карт арам ынже йом. Пайрем годым тыгай карт ятырак погынен кертеш. Кӱлеш кевыт воктене лач лиймеке, тудын дене сатум налаш южо еҥ эре пеленже, оксакалташте коштыкта. Калта йомеш гын, нине картым, оксам тӱлыде, пайдаланаш лийме жапым уэш шуяш, пӧртылташ ок лий. Пӧлек деч посна кодаш лиеш.
- Транспортышто кудалыштме пластик (проездной) картым оксакалтаге йомдарымеке, мӧҥгӧ марте миен шуаш нелырак лиеш. Тылзылан кудалышташ тӱлымӧ окса так арам лиймыже кумылым волта веле огыл, а угыч роскотыш пурен, весым налаш верештеш.
- Кассе чекым оксагалташ ида опто. Тиде термокагазыш печатлыше порошокыш бисфенол А веществам ешарат, а тудо аяранлан шотлалтеш. Порошокын тыгыде частицыже парняш пижын, йылмыш логалын кертмыж дене тазалыклан моткоч лӱдыкшӧ.
- 5. Оксакалташ пачер омса сравочым пыштыме койыш деч утлаш кӱлеш. Вет тушто улшо банк, карт, пӧлек сертификат да тендан кӧ улмыдам, кушто илымыдам палдарыше кагазла почеш пачер озан адресшым кӱчык жапыште рашемдаш лиеш. Мутлан, карт озан лӱмжым, фамилийжым соцкылыште муын, пачерым толаш пурен кертыт. Шолыштшын кӱсеныште тендан адрес, сравоч лиймеке, банк карт деч посна веле огыл, шӧртньӧ ӱгар, шергакан пого, мӧҥгыштӧ аралалтше анык оксадат толышын лиеш.
Р.ЧЕПАКОВА
