Республикын правительствыштыже
«Паша томам, но нелылык гыч лекме корным муман»
Марий Эл Республикын правительствыжын кумдаҥдыме заседанийыштыже тиде гана ЖКХ йодышым каҥашеныт. Тушто Марий Эл Республикын кугыжаныш кучемжын исполнительный органже деч РФ Федеральный Погынымашын Федераций Советыште еҥже Константин Косачёв лийын.
Тӱҥалтыште жаплан республик вуйлатышын пашажым шуктышо Александр Евстифеев погынышо-влаклан республикын бюджетшым аныклаш кӱлмӧ нерген ойлен.
«Ме республиканский да федеральный бюджетымат аныклен кучылтшаш улына. Тидын дене мый мом ойлынем? Эн ончычак бюджетым темыме нерген. Погымо нерген огыл, лачак темыме шотышто. Тудо производствым да ялозанлыкым моштен виктарен колтымылан кӧра чумырга. Теве мом ышташ кӱлеш. Чыла вереат негыздымын оксам кучылтмым чарныман», — манын жаплан Марий Эл Республикым вуйлатышын пашажым шуктышо.
Александр Евстифеев дисциплине йодышеш посна шогалын. Икымше, мом палемден регион вуйлатыше, — кажнын личный дисциплиныже, а тудын дене пырля финанс дисциплине.
«Икымше – «командировко туризмым» пытарыман. Могай амал дене, молан кайымым, командировкышто кӧ семын участвоватлымым умылтарыде, йодмашым возат, инвесторым кумылаҥдаш але иктаж-могай вес йодыш дене – раш огыл. Кӧ командировкыш миен толын, чылашт деч содержательный отчётым йодам: мом ыштенат, республиклан могай пайдам конденат, кузе паша умбакыже шуйна, кунам йодышым кораҥдаш лиеш. Тунам тиде командировко роскот шкенжым сула. Кокымшо – фининс дисциплиным сайын шуктыман. Кодшо ийын пашаеҥ-влакым утыктарен пытареныт, кӱлеш пособийым тӱлыде колтеныт. Финанс идалык петыралтын, йодыш решатлалтын огыл. Ме тиде ийысе кассовый кӱрылтышым петырен огына керт, а те кодшо ийысе роскотым тӱлаш йодыда», – манын Александр Евстифеев.
Жаплан республик вуйлатышын пашажым шуктышо ончыкыжым правительстве член-влакын должностной полномочий дене тӱргоч пайдаланыде, правовой кышкарыште веле пашам ышташ тӱҥалмышт нерген ойлен
Заседанийын тӱҥ темыже илаш йӧным пуышо объект-влакым 2017-2018 ийласе шыже-теле пагытлан ямдылыме йодыш лийын.
Тӱҥ докладым жаплан строительстве, архитектур да жилищно-коммунальный озанлык министрын пашажым шуктышо Константин Хижняк ыштен. Тудо республикыште олтымо тургым штатный режимыште эртымыж нерген ойлен. Илаш йӧным пуышо объектлаште кугу аварий ден ЧП лийын огыл. Вес олтымо сезонлан ямдылалтме паша план почеш эрта. Тудын тӱҥ йодышыжо — чыла кӱкшытан бюджет ден калыкын энергий ресурс дене пайдаланымыштлан погынышо парымышт. 1 апрельлан тудо 1267.8 миллион теҥешке шуын. Тидыже 2017 ий тӱҥалтыш деч 470,7 миллион теҥгелан шукырак.
«Паша томам, но нелылык гыч лекме корным муман. Республикым поро кумыл дене ырыктен огына керт. Сандене финанс блоклан Минздравым, Минобрнаукым вуйлатыше-влак дене пырля тӱткын тиде темым ончен лекташ кӱштем, тунам веле ме тиде пашам умбакыже шуена. Август деч вара огыл ме тиде йодыш деке пӧртылшаш улына». – палемден Александр Евстифеев.
Заседанийыште тӱрлӧ категорий еҥ-влаклан илен лекташышт кӱлшӧ эн изи оксан у кугытшо пеҥгыдемдалтын. ойырен налме да тудын кугытшым шотлен лукмо годым кучылталтеш. Тений январь-мартыште республикыште 25 тӱжем еш 164 миллион теҥге субсидийым налын.
Мучаште Александр Евстифеев Сеҥымаш кечылан ямдылалтме нерген ушештарышыжла, палемден: пайрем-влак калыклан каныш кече лийыт, но чиновник-влаклан огыл.
Е.Садовин.
