Ешыште икшыве шочмеке, лӱмым пуымо йодыш кужу жап шонаш тарата, южгунам каҥашымашымат луктеш. Марий артист, мурызо-влак йочаштлан могай лӱмым да лачшымак молан тыгайым ойырен налыныт?
Наталья Ямаева, МЭТР телекомпанийын журналистше:
— Икшывылан йот элысе, чот шуэн вашлиялтше да весе деч ойыртемалташ манын, утыждене оригинальный лӱмым пуаш шоненат огынал. Тудо эн ондак ачалӱм дене сылнын йоҥгышаш! Йоча шочмеке, кокымшо кечын Алексей пелашем азам ыштыме пӧртышкӧ толын (тӱлыман палатыште лийынам — авт.) да манеш: «Ну, ынде лӱмым пуаш кӱлеш. Тылат могай келша?» — йодеш. «А тылат?» — ваштарешыже йодым. «Аня» — коктынат иканаште каласышна. Тыге кидыштем кийыше чукай Аня лие. Адакшым ӱдырна 11 июльышто шочын. Православий календарь почеш 18 июльышто Анна лӱман-влакын именинышт. Тидат шотлан тольо. Ачамын тукымыштыжо Ална ыле. Кызытат ачам ӱдыремым южгунам Ална (марлаже тыге лиеш) манеш. Анна — уло тӱняште эн чапланыше лӱм. Статистик почеш, тӱнямбалне тыгай лӱман ик миллион утла еҥ ила. Аня лӱман-влаклан мо келшен толеш, тиде ӱдырнан койыш-шоктышыштыжо раш палдырна: ошалге, канде шинчан, поро кумылан да тыматле койышан. Мемнан ешыште эше цифр-влаклан да буква комбинацийлан ӱшанат. Анян ачаже — Алексей Анатольевич Ямаев (ААЯ). Йочана — Анна Алексеевна Ямаева ( ААЯ). Тек Аннушкам суксыжо ӱмыр мучко арала, а ме ача-ава семын илышын эн сайжым пӧлеклаш да осал деч кораҥдаш тыршена.
А.БАЙКОВА
