КУЛЬТУР ДА ИСКУССТВО

Балет школлан  — 20 ий

27 октябрьыште Э.Сапаев лӱмеш опер да балет академический театрыште кугу пайрем концерт лиеш. Тудо Йошкар-Олаште профессиональный балет школым почмылан 20 теммылан пӧлеклалтеш.

Балет школым почмо да тудын вияҥме корныж нерген кодшо кечылаште эртыше пресс-конференцийыште Э.Сапаев лӱмеш опер да балет академический театрын художественный вуйлатышыже Константин Иванов, И.С.Палантай лӱмеш культур да искусство колледжын директоржо Алексей Паскичев,  Бауман лицей вуйлатыше Григорий Пейсахович, театрыште балет труппым вуйлатыше, балет школын преподавательже Владимир Шабалин каласкалышт. 

И.С.Палантай лӱмеш тӱвыра да сымыктыш колледжыште «Куштымаш искусство» пӧлка 1999 ийыште почылтын. Тунемше ден студент-влаклан  шинчымашым налме верлан Бауман лицей шотлалтеш. Тиде школ Российыште вич эн виян школ радамыш пура. Куштымаш пӧлкам почаш Российысе Кугу театрын вӱдышӧ солистше, Российын сулло, Марий Элын калык артистше, а кызыт тӱвыра, савыктыш да калык паша шотышто министр   Константин Ивановын шонымашыже лийын.

Коло ий ончыч майыште Йошкар-Олаш толмо годым Бауман лицей (тунам эше 18-ше №-ан школ маналтын — авт.) вуйлатыше Григорий Ефимович Пейсахович унала ӱжын ыле. Школ кугу, чапле. Адакшым балет школым почаш тиддеч чапле верым муашат огеш лий шоненам. Тудо жапыште хореографий училищым почаш йӧнжат лийын огыл, сандене Палантай лӱмеш тӱвыра да сымыктыш колледжын директоржо Алексей Максимович Клёнов дене мутланымеке, колледжыште «куштымаш искусство» пӧлкам почаш кутырен келшенна, — ятыр ий ончычсо жапым шарналта Константин Анатольевич.

Шонымашет уло гын, тудым садак илышыш шыҥдараш лиеш манын, арам огыл калыкыште ойлат. Ты шотыштат тыгак лийын. Константин Иванов ден  Григорий Пейсаховичын шонен пыштыме пашашт вораҥын. Балет школ  1 сентябрь гыч шке илышыштым балет дене кылдаш шонышо-влакым икымше курсыш чумырен.

А кызыт пеҥгыдын ойлаш лиеш, икымше выпуск гыч ӱдыр-рвезе-влак чылан гаяк шӱдыр улыт. Нунын деч вара тиде школым тунем лекше-шамычат сценыште калыкым куандарат да кугешнаш таратат, — ойла К.Иванов. — Кызыт театрын балет труппыштыжо  шкенан балет школым тунем лекше-шамычак улыт. Нуно тыштак шочын-кушкыныт да изишт годсекак шочмо калыкнан тӱвыражлан, йӱлажлан шӱман улыт. Нуно эше тунеммышт годымак ончыкыжым Сапаев лӱмеш опер да балет театрын сценыштыже кушташ, театрын  да марий балетын историйжым возаш, Марий мландынан чапшым Российыште да йот эллаштат аралаш тӱҥалмышт нерген паленыт.

Балетын артистше-влак Россий, тӱнямбал кӱкшытан профессиональный конкурсла гыч кажне гана сеҥымаш дене пӧртылыт. Сандене мемнан артист-влак дене кугешнаш чыла амал уло. Профессиональный балетлан илышыштым пӧлеклыше-влаклан Российыште «Душа танца» призым пуат. А Э.Сапаев лӱмеш опер да балет академический театр гыч тыгай наградым чылаже кум артист налын. Мутат уке, эн ончычак Константин Иванов палемдалтын, тудын деч вара – Ольга Челпанова, Константин Коротков. 

Коло ий ончыч Константин Анатольевич дене эртыше вашлиймаш ынде историеш веле кодеш. Тудо тунам балет школым почмо нерген мутым огеш лук гын, таче кечылан тиде пашам ышташ огешат лий ыле, — палемдыш  Григорий Пейсахович. — Шонымашке шуын кертынна. А кызыт республикыштына искусствылан шӱмаҥше, тудым йӧратыше-влак чынже денак шукемыныт. Тидым театрыш мийымеке ужаш лиеш. Сандене ынде ме пеҥгыдын ойлен кертына: мемнан кундемна — тӱвыран рӱдыверже. А тидлан, мутат уке, тӱҥалтышым коло ий ончыч почмо балет класс пыштен.

Балет школын 20 ияш лӱмгечыжлан пӧлеклалтше пайрем концертыште чапланыше артист, куштымаш пӧлкаште тунемше-влак дене пырля балет искусствыш икымше ошкылым ыштыше-шамычат мастарлыкым ончыктат.   

 

Алевтина БАЙКОВА.

Е.Никифоровын фотожо.

Опубликовать в Одноклассники

Добавить комментарий