24-25 октябрьыште Саранск олаште мордва калыкын 7-ше погынжо эрта. Тушто марий калык деч Оньыжа Эдуард Васильевич Александров ден Марий Эл Правительстве вуйлатышын икымше алмаштышыже Михаил Зиновьевич Васютин улыт.
Пагалыме йолташ-влак, шергакан таҥ-влак,
торасе да лишыл родо-влак!
Мордва калык Съездыш погынышо-влакым марий калык лӱм дене шокшын саламлем.
Ме тендан дене ик тукым гыч лекше, кумда Урал гыч Балтика кумдыкым арален илыше тошто калыкын илыш-кончышыжым шуйышо тӱшка еш улына.
Мемнан тукымвожна – икте. Тӱрлымӧ вургемна, йоҥгалтарыме мурына икгай улыт. Йылмыштынат икгай шомак-влак шагал огытыл.
Тугеже ме иза-шольо калык улына!
Ойыртемат уло. Тидыже — шкешотан кӱкшыт.
Тендан калык гыч лекше икмыняр еҥ руш тӱшкаш куснен. Мордва руш калык дене пырля Россий кугыжанышлан пеҥгыде негызым пыштыше коклаште улеш.
Тендан калык гыч лекше икмыняр еҥын лӱмжым палемден кодыде огеш лий. Тиде: Аввакум да Ключевский, Эрьзя да Мордвинов, Чапаев да Девятаев, Табаков, Кадышева, Хоркина, Маскаев, Шукшин, Овечкин да Меркушкин. Да Кирилл патриарх!
Кугу кайыкын кок шулдыржо семын — эрзя ден мокша – тӱняште илат. Кок шулдыран кайык гына кавашке кӱзен кертеш, кӱкшын да писын чоҥештылеш. Тиде те улыда!
Российысе финно-угор тӱняште мордва — ончылно ошкылшо да чот денат кугу калык улыда. Адакше мордва эрге Пётр Тултаев Российысе финн-угор калык-влакын ушемыштым вуйлата. Тиде тендан сеҥымашда!
Марий-влак каяш лекме деч ончыч «чеверын» маныт. Кусараш гын, «мотор» кодса манмым ончыкта.
Тыландат ойлем: поян да моторын код, мордва калык!
Марий Оньыжа Эдуард Васильевич Александров
Снимкыште: Мордва калыкын регион-влак кокласе мер организацийжым вуйлатыше Юрий Мишанин, «Удмурт кенеш» чумыр удмурт ассоциацийын президентше Татьяна Ишматова да Марий Мер Каҥаш вуйлатыше, Оньыжа Эдуард Александров.
С.ПЕХМЕТОВАН фотожо.
