Кажнын — шке шонымашыже
Эрласе кечылан ӱшан лийшаш
Кундемыштына пытартыш жапыште шуко вашталтыш лийын, поснак Республикнам жаплан вуйлаташ весым шогалтыме чылам ӧрыктарен. Культур да искусство аланыште пашам ыштыше-влак у вуйлатыше лиймеке, эн ончычак могай проблемым решатлаш темлат?
Вера Каменщикова, «Мурсескем» усталык коллективын хормейстерже:
— Культур аланыште тыршыше-влаклан пашадарым кӱзыкташ кӱлеш, шонем. Тыгак ялысе культур пӧрт-влакымат уэмдыман. Мутлан, Йывансола ялысе культур пӧртыштӧ леведышым олмыкташ кӱлеш: шошым, шыжым тувыраш гыч вӱд чыпча.
Лидия Веткина, чапланыше марий тӱрызӧ:
— Лум шулен пытымеке, шӱк, куштыра моткоч шуко лектеш. Кызыт ятыр вере эрыктат. Ончыкыжымат йырваш арулык лиеш, шонем. Тӱвыра аланыште тыршыше-влакым пашадар йодышат тургыжландара. Культур учреждений-влак икте-весе дене келшен, ваш-ваш полшен пашам ыштышаш улыт. Тыге веле лектыш куандарыше лиеш.
Эльвира Попова, Марий Эл Республикын сулло артистше:
— Илышна саемеш манын ӱшаныме шуэш. Ме, Марий республикыште илыше-влак, вес кундемысе деч начарын илышаш огынал. Кундемна ару, яндар, корно сай лийшаш. Пашадарат кӱза, шонем. Кунам калыкын окса ситыше уло гын, тунам гына эрласе кечылан ӱшанже лиеш.
Олег Бакутов, мурызо:
— Концерт дене республик мучко шуко вере лийме. Ялласе калык марий телевиденийын передачым ончен, марий радиом колышт ок керт. Илышыш у технологий толеш, а ялыште илыше-влак тидым огыт шиж.
А.Байкова.